Il Departament federal da giustia e polizia vul proponer al Cussegl federal il 2027 in project d’ina lescha per meglierar la protecziun en il dretg civil, quai ha il minister da giustia Beat Jans declerà glindesdi davant las medias.
Plinavant sajan planisadas ina revisiun dal dretg d'armas ed ina nova strategia naziunala. Ultra da quai sustegnia il Cussegl federal ina lescha naziunala per la protecziun da violenza. A medem temp han il Cussegl federal ed ils represchentats dals chantuns fatg ina bilantscha positiva davart l'uschnenumnà roadmap da fin ussa cunter violenza a chasa e violenza sexuala ch’era vegnì concludì l’onn 2021.
Egualitad è centrala per il cumbat cunter violenza
L'egaulitad tranter um e dunna saja in element central per far frunt a la violenza, quai mussia in studi actual or dal territori tudestg. Gian Beeli, il co-directur Biro federal per l’egualitad da dunna ed um di che tgi che veglia cumbatter violenza stoppia prender a mauns il problem d'inegualitad.
Beeli fa plinavant attent a cifras preoccupantas: il 2025 èn 34 dunnas vegnidas mazzadas, uschè bleras sco dapi onns betg pli. Il dumber d’emprovas da mazzament è s’augmentà sin 59. Circa mintga terza persuna pertutgada moria.
Numer 142 per unfrendas da violenza
In dals conclus centrals è stà l’introducziun dal numer da telefon central per la cussegliaziun per victimas da violenza a chasa e violenza sexuala. Cusseglier federal Beat Jans ha annunzià ch'il numer 142 giaja en funcziun il prim da matg. In numer central nua che persunas pertutgadas pon s'annunziar da tut il temp.
