Ils Svizzers n'èn betg disads da seser en il stgir. Interrupziuns dal current èn raras, tenor las novas datas publitgadas mardi da la cumissiun federala d'electricitad (ElCom).
En media datti tenor las cifras dals provediders per l'onn 2024 circa mintga trais onns ina interrupziun. Sch'i dat interrupziuns dal current electric, èn quellas per regla da curta durada: l'onn 2024 en media 17 minutas per consument.
4 fin 52 minutas
En la Svizra franzosa èn vegnidas observadas las interrupziuns dal current electric las pli lungas en tschertas regiuns da l'artg dal Giura. Quellas vegnan provedidas da la Société des Forces Électriques de La Goule SA cun sedia a Saint-Imier (BE). Las chasadas pertutgadas han gì l'onn 2024 en tut 52 minutas interrupziun dal current electric.
Cuntrari a quai han ils Services industrials de la Ville de Nyon registrà mo quatter minutas senza electricitad. In dumber sumegliant a quel dad Oiken SA, il provedider vallesan che furnescha las regiuns Sion e Sierre.
Entant che las cifras naziunalas tranter ils onns 2022 e 2024 restan relativamain stabilas pon variar ils territoris pertutgads il pli ferm dad onn ad onn. Interrupziuns nunprevisas vegnan savens chaschunadas tras eveniments meteorologics, en spezial sche chametgs u stemprads donnegian indrizs.
66 uras per onn en Albania
Sch'i sa tracta ussa da paucas minutas u da plirs tozzels minutas ad onn, la Svizra tutga tar ils pajais cun las raits las pli fidablas. Ella sa chatta a la testa da la rangaziun europeica – sper la Germania, la Frantscha, il Reginavel Unì ed il Luxemburg – che han per ils onns 2017 fin 2019 mintgamai interrupziuns da pli pauc che 20 minutas per persuna ed onn, quai tenor in studi da la Banca mundiala.
Da l'autra vart da la scala sa chatta l'Albania cun circa 40 interrupziuns per onn e circa 66 uras senza forza electrica per persuna, sco ch'i resorta da las medemas datas. Er la Georgia e la Macedonia dal Nord, ils pajais vischins da l'Albania, èn confruntadas savens cun interrupziuns da passa 6 uras.
