RTR: Pertge na tanschi lura probablamain tuttina betg per Regula Rytz?
Adrian Camartin: Sper ils socialdemocrats sustegna be la Partida verda definitivamain sia candidata. Ils verd-liberals n'èn betg perina. E sch'ins quinta ensemen las vuschs dals Verds, da la PS e p. ex. la mesadad dals verd-liberals dat quai 91 vuschs. Quai è lunsch davent da la maioritad absoluta da 124 vuschs, prendì il cas che tuts fan era diever da lur vusch.
Da l'autra vart vegnan la Partida populara ed ils liberaldemocrats ensemen sin 103 vuschs. Ed era or da la fracziun dal center ch'unescha la PCD, la Partida evangelica e la PBD datti indizis ch'els vegnan a sustegnair per gronda part la reelecziun da cusseglier federal Ignazio Cassis. Er sche be la mesadad dals 44 parlamentaris dal center voteschan per il Tessinais tanschessi anc per sia reelecziun.
Pertge na survegnan il Verds betg dapli sustegn da tschellas partidas?
Qua datti pliras raschuns:
- Nagin sez è liber en il Cussegl federal.
- In elegì, en quest cas Ignazio Cassis, stuess bandunar sfurzadamain il Cussegl federal.
- Ch'in cusseglier federal n'è betg vegnì reelegì hai dà be quatter giadas en l'istorgia da la Confederaziun. Las ultimas duas giadas: Ruth Metzler ha stuì dar giu ses sez a Christoph Blocher il 2003. Ed il 2007 ha lez stuì dar giu ses sez ad Eveline Widmer-Schlumpf.
- Ina maioritad dal parlament vul en quest connex dapli constanza e ruaus en la regenza.
Uschia datti era la pretensiun che la Partida verda stoppia anc spetgar ed en in emprim pass confermar ses success a chaschun da las proximas elecziuns federalas en quatter onns. Sumegliant sco igl è ì cura che la PPS ha pretendì in segund sez en il Cussegl federal.
E cler vai era per pussanza. Nagina partida vul dar giu in sez en la regenza.
Questa furmla stat per la repartiziun constanta dals sezs en il Cussegl federal. Dal 1959 fin il 2003 avevan la PS, la PCD e la PLD mintgamai dus sezs en la regenza. La PPS aveva in sez. Dapi l’elecziun da Christoph Blocher (PPS) che ha recaltgà il sez da Ruth Metzler (PCD) l’onn 2003 ha la PPS 2 sezs e la PCD be in. Quai correspunda meglier al principi da concordanza. Vul dir: ils sezs en il Cussegl federal vegnan repartids tenor la fermezza da las partidas en il parlament.
A las ultimas elecziuns naziunalas ha la Partida verda però pudì recaltgar 21 novs mandats en il parlament. Quai ha lura er lantschà las discussiuns davart la furmla magica. Tenor la fermezza actuala da las partidas avessan ils Verds il dretg d’in sez sin donn e cust dad in sez liberaldemocratic.
Quai vul dir ch'i dovra l'emprim ina discussiun davart l'avegnir da la «furmla magica»?
Exact. Questa discussiun gira gia. Ils socialdemocrats vulan p. ex. che las duas partidas fermas hajan en l'avegnir dus sezs. Ils ulteriurs sezs duain vegnir repartids sin las proximas trais partidas.
Gerhard Pfister, il president da la PCD, vegniss il pli gugent davent d'ina repartiziun stricta tenor fermezza da las partidas. El ha fatg la proposta da limitar il temp d'uffizi da mintga cusseglier federal sin otg onns. Quai avess l'avantatg ch'i dess mintga quatter onns gist plirs sezs che fissan d'occupar da nov. Uschia vegniss quai pli simpel da reflectar il resultat da las elecziuns federalas en la regenza.
RTR actualitad 17:00
