La taxa da medias vegn uschè u uschia sbassada da 335 francs sin 300 francs il mais per chasada. L'iniziativa SRG SSR pretenda da sbassar la taxa sin 200 francs per chasada. Per RTR muntass quai ch'ins stuess dar giu la clav a Cuira e producir novitads rumantschas da Turitg, di il president da l'uniun purtadra SRG R Vincent Augustin.
En emprima lingia vegniss centralisà – e probabel che RTR svaniss da Cuira. Il rumantsch perdess sia olma. Rumantsch a Turitg n'è betg il medem sco rumantsch en il Grischun.
Cun in budget da bun 22 milliuns francs occupa RTR passa 160 collavuraturs e collavuraturas a Cuira ed en ils differents biros regiunals dal Grischun. Che quai giess a perder tar in Gea a l'iniziativa, dementescha il cusseglier naziunal da la PPS Roman Hug. L'incumbensa da basa da la SRG SSR saja fixada cleramain en la Constituziun federala. Ils basegns da la Svizra cun quatter linguas e noss chantun cun trais linguas stoppian vegnir resguardads.
La SRG SSR sto esser abla d'ademplir sia incumbensa era cun pli paucs daners. Ins na po betg simpalmain centralisar tut a Turitg.
Cun quai n'è Vincent Augustin betg perina: sch'i vegniss stritgà ina part talmain gronda dals daners, na saja betg pussaivel da far il medem en tuttas regiuns linguisticas da la Svizra ed er betg da mantegnair tut ils lieus da producziun. Insatge rumantsch dettia vinavant, ma i na saja betg il medem sco sch'i vegn fatg regiunal u sch'i vegn tut centralisà, di Augustin.
Roman Hug è persvadì ch'ins pudess mantegnair il service public en las linguas minoritaras era cun damain daners. El è per l'iniziativa e crititgescha la grondezza e la multifariadad da la purschida da la SRG SSR. Ins stoppia simplamain spargnar en il gist lieu. Era cun in budget pli pitschen haja la SRG SSR avunda daners e la rapportaziun per rumantsch stoppia avair ses plaz.
Sche la SRG SSR sto vegnir ora cun marcantamain pli paucs daners e tuttina ademplir la concessiun – quai decida la populaziun ils 8 da mars.
Tar la survista da las votaziuns
