L'enviern passà hai dà pli paucas unfrendas entras lavinas – quai en cumparegliaziun cun la media dals ultims 20 onns. Enfin l'entschatta avrigl sajan 12 persunas mortas en lavinas, communitgescha l'Institut federal per la perscrutaziun da naiv e lavinas a Tavau. Tar tut las unfrendas sa tracti da sportistas e sportists ch'eran da viadi en territori betg segirà. Set persunas faschevan turas, tschintg eran da viadi a val sper las pistas.
En il sid ed en regiuns pli bassas hai dà quest enviern extrem pauca naiv. Tschertas staziuns han perfin mesirà en il Grischun dal sid ed en il Tessin uschè pauca naiv sco anc mai.
Cumenzà ha l'enviern pli baud che auters onns cun naiv per part gia il november, scriva l'SLF. La fin december haja lura la ferma plievgia fin sin 2'800 meters chaschunà bleras e per part grondas lavinas. Dapi il schaner saja la situaziun dentant sa normalisada.