Maioritad beneventa candidatura
La consultaziun per sustegnair ils gieus olimpics e paralimpics d'enviern 2038 en Svizra è terminada – e para per gronda part positiva. Quella consultaziun aveva il Cussegl federal incumbensà l'entschatta da l'onn. 103 da 120 participants da la consultaziun s'expriman da princip per la candidatura. Il Cussegl federal ha prendì per enconuschientscha ils resultats e deliberà la missiva al parlament.
Il sustegn vegn oravant tut dals chantuns che pudessan esser lieu d'occurrenza, da las federaziuns da sport sco era d'organisaziuns economicas e turisticas. Savens vegnan numnadas las schanzas per la promoziun dal sport, la coesiun sociala, l'inclusiun ed il turissem. Er il concept d'occurrenza decentral cun infrastructura existenta chatta in vast consentiment.
Critica: consequenzas per l'ambient e ristgs finanzials
Malgrà il grond sustegn èn 11 participants a la consultaziun sceptics u encunter. Crititgadas vegnan surtut surpassaments pussaivels da custs, cumpetenzas betg cleras tar la finanziaziun sco er effects sin la natira e l'ambient.
Organisaziuns d'ambient pretendan finamiras da persistenza pli liantas ed in monitoring pli sever. Plirs acturs pretendan plinavant dapli pled en chapitel democratic e s'expriman per in referendum facultativ.
Il proxim pass fa il parlament
Il Cussegl federal na vesa suenter la consultaziun nagin basegn da midar: La contribuziun federala duai vinavant muntar a maximalmain 200 milliuns francs, senza garanzia statala da deficit. Chantuns e vischnancas duain sa participar almain en la medema dimensiun. Cun la finiziun da la consultaziun è la fatschenta uss tar il parlament che decida davart il conclus da planisaziun ed uschia davart la rolla da la Confederaziun tar la candidatura olimpica 2038.