In rumantsch a la testa
Al cumenzament da la sessiun d'enviern elegia il Cussegl naziunal mintgamai il president u la presidenta da la Chombra gronda. Questa giada è quai Martin Candinas, il cusseglier naziunal da l'Allianza dal Center, daventa uschia pli aut Svizzer.
Dus novs per il Cussegl federal
Per gronda tensiun ha procurà l'elecziun dals novs Cussegliers federals. Entant che Albert Rösti, che valeva sco favurit per la successiun dad Ueli Maurer, è vegnì elegì, è stada l'elecziun dad Elisabeth Baume-Schneider ina surpraisa. Ella ha gudagnà la cursa encunter Eva Herzog che valeva sco favurita.
Dal lufs, preventivs enfin tar las rentas
Il luf sto tremblar
Il luf ha procurà per emoziuns ch'èn idas ad aut en il Cussegl naziunal. Suenter il Cussegl dals stadis ha quel era decidì ch'i duai vegnir pli simpel da schluppettar il luf. La lescha da chatscha duai vegnir adattada. Il parlament ha decidì ch'il luf duai vegnir reglà sco il capricorn. Uschia duai esser pussaivel dad ir a chatscha dal prim da settember fin ils 31 da schaner – dentant sut tschertas cundiziuns che ston vegnir lubidas da la Confederaziun.
Futur da l'agricultura AP2022+
Il project «politica agrara suenter il 2022» (AP2022+) è vegnì sistì avant 2 onns. Il parlament ha crititgà ch'i manchia ina strategia a lunga vista per segirar il provediment da mangiativas e da reducir il sfarlattim da mangiativas. Questa stad ha il Cussegl federal preschentà in nov rapport. Il Cussegl dals chantuns è entrà en materia.
Preventiv
Sco mintg'onn debattescha il parlament en la sessiun d'enviern davart il preventiv. En tut vul la Confederaziun dar ora 80,5 milliardas, e prender en 79,8 milliardas francs. Omaduas chombras han approvà quai.
Dapli AVS per tuts
L’iniziativa da l'Uniun sindicala svizra vul augmentar la renta per tuttas e tuts. I duai dar ina 13avla renta da l'AVS. Il Cussegl naziunal na vul quai dentant betg. Sco proxim sto anc il Cussegl dals chantuns decider en chaussa avant ch'i vegn votà a l'urna.
Cassa da pensiun
Dapli persunas emploiadas duain pajar en la cassa da pensiun. Perquai ha la Chombra pitschna adattà il sistem da la deducziun da coordinaziun. Per gronda discussiun ha procurà tgi e quant fitg che las annadas che van en pensiun curt suenter che la refurma va en vigur duain survegnir sco sustegn – las mesiras da cumpensaziun.
Dapli da la sessiun d'enviern e quai che è capità davos las culissas pudais vus era tadlar en il Café federal
Il podcast politic. In sguard davant e davos las culissas da la politica naziunala.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.