Quant bleras persunas supporta la Svizra? Quai è la dumonda che stat a l’entschatta da l’iniziativa da persistenza da la PPS – la partida dat era gist la resposta. Enfin l'onn 2050 na duai la populaziun en Svizra betg surpassar 10 milliuns. Oz vivan en Svizra da quai da 9 milliuns persunas.
Gia ussa sentia la populaziun las consequenzas negativas dal creschament, di il cusseglier naziunal grischun Roman Hug da la PPS. Uschia na possia quai betg cuntinuar.
Mintga Grischuna e mintga Grischun che stat en colonna sa quai. Mintgin che ha da pajar in tschains da locaziun aut sa ch’il spazi è limità.
L'iniziativa pretenda che la Confederaziun ed ils chantuns prendian mesiras per in svilup persistent da la populaziun – en spezial, per proteger l’ambient e las resursas naturalas, per impedir ina surtgargia da l'infrastructura e dal provediment da la sanadad e per proteger las segiradas socialas.
Per ch'i na vegnia betg usche lunsch, duai il Cussegl federal gia ussa prender mesiras en cas che la populaziun surpassa 9,5 milliuns. Concret pretenda l'iniziativa dal Cussegl federal da prender mesiras en il sectur d'asil e da negoziar da nov contracts internaziunals che promovan l'immigraziun en Svizra. Sche quai na gartegia betg e la populaziun en Svizra surpassa la limita da 10 milliuns gia avant l'onn 2050, stoppian tals contracts vegnir visads, pretenda l'iniziativa en las disposiziuns transitoricas.
Iniziativa pericliteschia bainstar da la Svizra
Gist perquai saja l'iniziativa da la PPS in privel per il bainstar da la Svizra, di il cusseglier naziunal grischun, Jon Pult, da la partida socialdemocratica. L'iniziativa tematiseschia bain problems reals, ella sbaglia dentant tar ils responsabels per quella situaziun – per exempel sch'i va per ils tschains da locaziun.
L’immigraziun po esser in da bleras raschuns. Ma il motiv principal per ils tschains da locaziun auts è la quota memia gronda d’immobiglias sco objects da speculaziun e ch’i vegn fabritgà il fallì. I dess soluziuns per spazi d’abitar pli favuraivel.
La populaziun svizra vegnia plinavant adina pli veglia. Sch'i na dettia betg avunda immigraziun manchian la finala las persunas per l'economia. Uschia saja il funcziunar da noss stadi periclità.
Vulain nus che noss ospitals e las chasas da tgira funcziunan u essan nus pronts d’acceptar che bler na funcziuna betg pli? Ils pajais cun dapli emigraziun han pli gronds problems che nus.
Sch'ins veglia propi far frunt als problems da l'immigraziun, lura dovri ina buna politica da traffic, ina planisaziun dal territori ed ina politica d'ambient persistenta e betg in stop da l'immigraziun. In Gea a l'iniziativa da persistenza mettess perencunter en privel ils contracts bilaterals cun l'UE, quai che faschess grond donn a la Svizra, agiunta Jon Pult.
Svizra duai daventar meglra e betg mo pli gronda
La Svizra na stoppia dentant betg simplamain vegnir pli gronda, mabain meglra, respunda Roman Hug.
Naturalmain duvrain a curta vista dapli persunal qualifitgà. Ma quellas persunas che vegnan tar nus dovran era spazi da viver, tgira en l’ospital e scolas. Quai è ina spirala che crescha memia spert ed ha in effect malsaun.
Ina raschun vesa Roman Hug gist tar ils contracts bilaterals e la circulaziun libra da persunas cun l'UE. Enstagl d'in per milli persunas mintg'onn, sco quai ch'il Cussegl federal haja empermess da lezzas uras, vegnian ozendi pliras dieschmilli persunas mintg'onn per sa chasar en Svizra. La politica haja ussa la pussaivladad da negoziar da nov quels contracts. Na gartegia quai betg saja la davosa consequenza da visar quels contracts.