Siglir tar il cuntegn

Header

Priska Seiler Graf da la PS che tegna ad aut in cedel per rimnar suttascripziuns cunter ils aviuns da cumbat.
Legenda: Ils adversaris dals aviuns da cumbat entschaivan a rimnar suttascripziuns. Keystone
cuntegn

Novs aviuns da cumbat Il pievel duai pudair decider a l'urna

La Gruppa per ina Svizra senza armada, ils Verds e la PS han lantschà il referendum cunter la fatschenta d'armaziun. Ils aviuns sajan memia chars e na fetschian ozendi nagin senn, argumenteschan ils adversaris.

Davart la cumpra da novs aviuns da cumbat per 6 milliardas francs duai la populaziun pudair decider a l'urna. La Gruppa per ina Svizra senza armada (Gsoa), ils Verds e la Partida socialdemocratica han lantschà il referendum cunter questa fatschenta d'armaziun.

Aviuns na correspundian betg a situaziun actuala

Schizunt il Cussegl federal saja da l'avis ch’ina guerra convenziunala na saja strusch probabla. I dettia auters privels. En connex cun guerra da cyber, terrorissem e missils da cruschada na fetschian aviuns da cumbat nagin senn, argumenteschan ils adversaris dals aviuns da cumbat.

En pli saja la fatschenta in sfarlattim da daners. Ils aviuns na custian betg 6 milliardas, mabain cun mantegniment e gestiun 24 milliardas francs. Quels daners manchian lura per cumbatter la midada dal clima ubain en il sectur da sanadad, uschia ils adversaris dals aviuns.

Vuschar il settember

Sustegnì vegn il referendum er da la Juso, dals Giuvens Verds e diversas organisaziuns da pasch. Fin ils 9 d’avrigl han ils iniziants uss temp da rimnar 50’000 suttascripziuns. Sche quai reussescha, vegn il referendum probabel il settember davant il pievel.

Fasa dad evaluaziun

Il Parlament federal aveva decidì il december cun gronda maioritad da cumprar novs aviuns da cumbat. Il mument vegn anc evaluà tgenin aviun da cumbat che vegniss cumprà. Quatter producents han preschentà la stad passada lur aviuns. I sa tracta tar quels da l'aviun F-35 da Lockheed Martin, dal F/A-18 Super Hornet da Boeing, dal Rafale dal producent franzos Dassault e dal Airbus-Flugzeug Eurofighter.

Ord l'archiv:

RTR novitads 12:00

Artitgels legids il pli savens

Scrollar a sanestra Scrollar a dretga