Cumenzà ha tut avant set onns en in hostel en Tailanda. Là ha Eva Gaudenz emprendì ad enconuscher Matt McComber, ch'è Canadais ed oz l'um dad Eva. Gia baud saja stà cler che quai saja ina relaziun seriusa – e quai ha muntà ch'els han stuì decider nua ch'els vegnian a star ensemen en il futur.
Matt fiss stà pront da vegnir a star en Svizra – ed oriundamain saja quai era stà il plan dad Eva. Ma vegnì èsi tut auter.
Suenter ses studi è Eva Gaudenz il 2019 ida a star per in «onn da prova» en la patria da ses partenari: Thunder Bay. Ina citad dad enturn 100'000 abitants ed abitantas en la provinza dad Ontario.
Ils emprims mais saja ella insumma betg stada persvadida da quest lieu ed haja manegià ch'ella na vegnia segir mai a star là. Ma en il decurs da quest «onn da prova» saja quai sa midà. Ella saja s'inamurada da la glieud sco era dal «lifestyle» pli plaun e pli patgific. Ed uschia è avant tschintg onns crudada la decisiun, ch'ella vegnia a star a Canada.
Lavur intensiva per il siemi
Dapi lura han ella e ses partenari maridà – quai haja fatg tut pli simpel. Uschia haja el pudì vegnir tar ella a Turitg a star e lavurar ils davos dus onns. Ed era per Eva saja tras quai stà bler pli simpel da survegnir sia permissiun da dimora per Canada, quai che saja era uschia anc stada ina enorma lavur.
-
Bild 1 von 2. Igl era da pachetar bler ed uschia ch'i dovra pauc lieu ... Bildquelle: RTR.
-
Bild 2 von 2. ... e d'organisar tut ils documents e las permissiuns. Bildquelle: RTR.
Sur plirs mais haja ella stuì investir almain 1 – 1,5 dis l'emna per quella permissiun.
Igl era qua anc insatge, là anc in document ... sco ina lavur a temp parzial supplementara.
Cun la savida ch'ella vegn ad emigrar – è Eva Gaudenz sa fatga independenta e fa marketing da social media. Cunquai ch'ella fa sia lavur exclusivamain «remote» – haja ella la speranza da pudair far quella era davent da Canada uschia ch'ella stoppia almain professiunalmain betg entschaiver da nov.
Da Turitg en la nova patria
Ils davos mais ed emnas avant lur partenza haja lur vita consistì da blera lavur administrativa, vegnir liber da quasi tut quai ch'els possedan en Svizra – e surtut: blers cumiads. Quels sajan fitg emoziunals e giajan a la substanza. Dentant era da stuair prender cumià dad ina versiun da sasezza che vegn betg pli ad exister en quella furma saja per Eva Gaudenz prest il pli dir vi da quest entir process.
Ella sa legria dentant fermamain sin tut quai che spetga: sin la glieud a Thunder Bay, sin ina vita pli patgifica – ed era da suenter blers onns da preparaziun finalmain dastgar arrivar. Perquai che era sch'ella laschia enavos in dachasa dastgia ella en il medem mument era turnar en in dachasa.