La Svizra stoppia anc morder ditg vid ils custs da la crisa da corona. La crisa saja dramatica per l'entir mund e tutgia era l'economia da la Svizra ferm. Quai di Thomas Jordan, il president da la Banca naziunala svizra.
Influenza sin il bainstar en Svizra
Il mument muntia l’activitad da l’economia Svizra be a 70 fin 80% dal nivel usità, uschia Jordan en ina intervista cun la «SonntagsZeitung». Quai custia mintga mais 11 fin 17 milliardas francs. Blers na possian gnanc metter avant tge che questas cifras muntian per il bainstar da la Svizra. El quinta che l’economia dat ensemen uschè fitg sco dapi la segunda guerra mundiala respectiv dapi la gronda depressiun dals onns 30 betg pli.
Pli ditg che quintà
L'entschatta hajan ins anc pudì quintar che tut duria be curt temp. Ussa sa mussia dentant che las consequenzas da la crisa da corona sajan pli gravantas che quintà. Sche l'economia da la Svizra na possia betg sa revegnir entaifer curt temp lura possia quai esser che era firmas che sajan fin uss stadas saunas, fetschian naufragi. I giaja uss d'impedir ils donns consecutivs per l'economia.
