Mintg'onn pon ins far ponderaziuns nua ch'ins po spargnar il meglier. Persunas pensiunadas profitan – premias da la cassa da malsauns restan ina chargia. Qua datti ina survista.
Daners supplementars per persunas pensiunadas
La midada da la lescha la pli impurtanta pertutga l'onn che vegn las persunas pensiunadas. Il december 2026 vegn pajada per l'emprima giada la 13avla renta da l'Assicuranza per vegls e survivents (AVS). Per persunas singulas en la vegliadetgna da renta munta quai entradas supplementaras da tranter 1260 e 2520 francs. La renta supplementara survegn, tgi che è il december autorisà da far pretensiuns. L'autezza da la summa correspunda ad in 12avel da las rentas pajadas ora en il decurs da l'onn. Per conjugals è la calculaziun pli cumplitgada.
L'electricitad vegn pli bunmartgada
Ils pretschs d'electricitad sa sbassan il 2026 en media per quatter pertschient. Per ina chasada tipica custa l'ura kilowatt per l'onn proxim 27.7 raps – per l'entir onn correspunda quai ad in respargn da 58 francs en media. Igl è il terz onn en seria cun pretschs d'electricitad che sa sbassan, quai suenter l'augment rasant il cumenzament da la guerra en l'Ucraina.
Igl èn bain pitschens respargns, ma durant ils onns summeschan quels tuttina. Las ovras electricas annunzian lur novas tariffas d'electricitad mintgamai la stad a las autoritads per l'examinaziun. Ils novs pretschs d'electricitad valan mintgamai a partir dal prim da schaner da l'onn nov.
Damain daners per electricitad da fotovoltaica
Las chasadas pon sa legrar dals pretschs d'electricitad che sa reduceschan, per ils gestiunaris d'implants fotovoltaics datti però bler pli paucs daners. Tenor stimaziuns sa reducescha l'indemnisaziun per bunamain 25%.
I dat pia cleramain pli paucs daners per furnir electricitad solara en la rait. L'impuls per la diminuziun è la nova lescha d'energia ch'entra en vigur a partir dal prim da schaner. Las indemnisaziuns vegnan armonisadas en l'entira Svizra. Cunzunt la stad survegnan las proprietarias ed ils proprietaris d'implants solars pli paucs daners en quels mais ch'i dat memia blera electricitad.
Las premias da las cassas da malsauns s'augmentan
Tar las cassas da malsauns s'augmenta la chargia puspè l'onn proxim. Las premias s'augmentan en media per 4,4%. La premia mensila media è da nov 393 francs per persuna. Retschertgas mussan ch'ils custs da sanadad auts fan ils pli gronds quitads als umans en Svizra.
Damain tschains per credits da consum
Tgi che vul far debits, profitescha da la situaziun dal martgà. L'onn current ha la Banca naziunala sbassà il tschains directiv a 0%, ed ils tschains sa reduceschan er en general. Quai vul dir: ils daners èn bunmartgads. Quai è positiv per tut ils proprietaris da chasas che ston renovar las ipotecas l'onn proxim. Ed er credits da consum èn vegnids pli favuraivels. Per onn vegnan en Svizra novs credits da consum da passa quatter milliardas francs. Ils tschains sbassants sin il martgà han per consequenza ch'il tschains maximal per credits da consum vegn reducì da la Confederaziun per 1% a partir dal prim da schaner 2026. A partir da lura munta quest tschains maximal per credits da consum a 10%.
Ils tschains restan bass
Tendenzialmain profitan er las locatarias ed ils locataris da la situaziun dals tschains bass. Probablamain na datti l'onn proxim nagin augment dal tschains da referenza ed er l'inflaziun è bassa. Quai vul dir che la gronda part da las chasadas po partir dal fatg ch'il tschains da locaziun dals contracts currents vegn a restar stabil – in augment general dal tschains da locaziun n'è betg en vista tar la gronda part da las chasadas.