Dals pajais commembers da l'OECD, l'Organisaziun da cooperaziun e svilup economic, dat sulet la populaziun dals Stadis Unids ora dapli daners per la sanadad che la svizra. Sin plazza trais suonda la Germania.
Motiv per quest svilup saja tranter auter l'augment da malsognas cronicas. Quai er perquai che la populaziun vegnia adina pli veglia. Entras meglra tecnica vegnian ils sistems da sanadad era adina pli effectivs, quai custia dentant er dapli.
Chasadas svizras portan adina dapli dals custs
La Svizra dat or radund 12,2% dal BIP per la sanadad – quai en 4,7 puncts procentuals pli pauc ch'ils Stadis Unids ed 1 punct procentual dapli che la Germania. Fin il 2030 vegn dentant spetgà in'ulteriur augment tar las expensas en Svizra. Tenor l'OECD pudess la cumpart da las expensas da sanadad tar il BIP crescher en Svizra per 2,6 puncts procentuals. Per la Germania e l'Austria vegn en cumparaziun spetgà in'augment da 1,2 ed 1,4 puncts procentuals.
Plinavant portan las chasadas privatas en Svizra bunamain in terz dals custs (29%). Questa cumpart è fitg auta, en relaziun internaziunala.
RR novitads 16:00
