Il traffic da rauba saja uschia sa muvì il 2019 puspè sin il nivel dal 2017 – suenter l’onn da record 2018. Betg midà hai, che la prestaziun da transport sin binaris munta a 37% e quella sin via 63%. En tut haja la prestaziun da transport muntà a passa 27 milliardas tonnas kilometricas. Ina tonna kilometrica correspunda al transport dad ina tonna sur in kilometer.
En cumparegl internaziunal è la cumpart sin ils binaris cun 37% auta en Svizra, scriva l'Uffizi federal da statistica. En la UE saja la media da quella cumpart radund 18 puncts procentuals pli bass tar radund 19%.
Adina dapli camiuns da l'Europa da l'Ost
Bunamain in terz da la rauba è vegnida transportada il 2019 da vehichels ch’èn immatriculads en l’exteriur. Ils ultims onns saja il dumber da camiuns da l’Europa da l’Ost s’augmentà marcantamain. Camiuns da la Pologna fan or entant gia 13% dal traffic da rauba – tuttina bler sco camiuns talians. Pli blers camiuns cun rauba vegnan be da la Germania (22%) tras la Svizra.
