Cun in certificat da Covid duessan viadis bainbaud puspè esser pussaivels. La branscha da viagiar è perquai cuntenta cun ils plans dal Cussegl federal. La cumprova per persunas vaccinadas, guaridas u testadas negativ vegnia il dretg mument, hai num da la vart da l’Uniun da viadis svizra. Il certificat duai esser avant maun en Svizra a partir dals 7 da zercladur. Quai ha il Cussegl federal annunzià la mesemna.
Speranza sin ina svelta soluziun digitala
Sch'il certificat simplifitgescha lura propi il viagiar, pudess quai esser in schlantsch per la stagiun da stad. Er la plazza aviatica da Turitg spera perquai sin ina svelta soluziun digitala, sco ina pledadra da l'eroport ha ditg envers SRF. Els pretendian gia dapi emnas ch'i dettia bainbaud ina conferma digitala per persunas vaccinadas, guaridas u testadas.
E la societad aviatica Swiss examinescha entant gia, co ch'ella pudess lura examinar e registrar las datas dals viagiaturs, cur ch'il certificat è pront. Il plan è, che questas infurmaziuns vegnan endatadas a la plazza aviatica cun in resultat ch'è segir da falsificaziuns e che mussa, sch'ina persuna dastga viagiar u betg.
