L'ostilitad encunter ils gidieus resta in problem er en Svizra. Quai ha mussà il rapport d'antisemitissem 2025 che la Federaziun svizra da las communitads israelitas e la Fundaziun cunter rassissem ed antisemitissem han publitgà oz a bun'ura. En blers cas èn las guerras en il Proxim Orient l'impuls per incidents antisemitics.
Entant ch'igl ha dà in regress d'incidents antisemitics en il mund real, ha la Federaziun da las communitads israelitas registrà in grond augment da l'antisemitissem online. En l'internet èn vegnids registrads bunamain 2'200 incidents durant l'onn da rapport, sco ch'i resulta dal rapport d'antisemitissem da la Federaziun svizra da las communitads israelitas (SIG) e da la Fundaziun cunter rassissem ed antisemitissem (GRA). L'onn avant eran quai var 1'600.
Avant ils 7 d'october avevan nus mintga pèr onns forsa ina giada in incident.
Dapi ils 7 d'october 2023, pia la gronda attatga terroristica da la Hamas e la guerra en la Strivla da Gaza, saja er la vita da las Gidieuas e dals Gidieus en Svizra sa midada, di Jonathan Kreutner, il secretari general da la Federaziun svizra da las communitads israelitas.
Er remartgas antisemiticas en l'internet fan gronds quitads a Jonathan Kreutner.
Il svilup mussa in cler augment da 37% d'incidents antisemitics online.
Er ils onns passads haja adina puspè dà in augment. Ma quest augment saja tuttina extraordinari.
Er il Grischun n'è betg exclus
L'onn 2025 èn vegnids registrads en tut 10 cas antisemitics en il Grischun. Ils cas sa repartan sin pliras categorias:
- 2 acts da violenza – il Grischun tutga pia tar ils chantuns cun las pli bleras attatgas corporalas.
- 1 insulta
- 4 constataziuns antisemiticas
- 2 graffitis antisemitics
- 1 donn material
En il context da tut la Svizra n'è il Grischun betg il chantun cun ils pli blers cas – Turitg è cleramain a la testa cun 99 cas. Ma durant che là il dumber è aut pervia da l'auta densitad da la populaziun e da bleras annunzias online, sa distingua il Grischun tras in dumber aut da cas violents.
Incidents 2025 a Tavau
La stad 2025 è Tavau puspè vegnì en il focus – questa giada betg pervia d'ina occurrenza gronda internaziunala, mabain pervia d'ina seria d'abus antisemitics che ha spaventà la cuminanza gidieua en Svizra.
Attatgas sistematicas sin giasts gidieus
Il fanadur 2025 hai dà en il lieu da vacanzas pliras attatgas antisemiticas sin giasts da vacanzas gidieus. Tenor la Federaziun svizra da las communitads israelitas (SIC) duai in delinquent avair attatgà intenziunadamain persunas cun apparientscha gidieua. Ils surpassaments tanschevan d'ingiurias verbalas sur tensiun fin ad attatgas mortalas. Almain tschintg persunas pertutgadas èn s'annunziadas tar il SIC.
Sulettamain ina da las persunas pertutgadas ha fatg ina denunzia formala, tge che ha er da far cun la chargia emoziunala e cun la malsegirezza da bleras persunas pertutgadas. La Polizia chantunala dal Grischun ha cumenzà cun retschertgas, ha dentant stuì interrumper quellas il cumenzament da settember per mancanza d'indicaziuns duvrablas.
Brev da smanatscha encunter hotel koscher
Parallelamain a las attatgas è vegnì enconuschent il fanadur in ulteriur cas che ha inquietà supplementarmain la cuminanza gidieua: In hotel «koscher» a Tavau ha survegnì ina brev da smanatscha che cuntegneva insultas ed connexs antisemitics cun il naziunalsocialissem.
L'incident è vegnì public pir mez settember 2025 – ed ha chaschunà sgarschur en l'entir pajais. Il SIG ha confermà l'entrada dal scriver ed ha discurrì d'in exempel «spezialmain schoccant» da situaziuns da smanatscha actualas.