RTR: Selina Capaul, campiunessa svizra en bittar la lantscha. Tge muntada ha quest titel?
Selina Capaul: Ina fitg gronda muntada, cunquai ch'igl è il titel tar ils activs e na betg tar las junioras sut 20 onns. Jau sun simplamain ida là e hai savì ch'jau sun ina da las favuritas. Ch'igl ha lura funcziunà cun la constanza da trair quatter giadas sur 50 meters e la fin anc cun in nov record persunal è mega.
La lantscha è ida sin 52 meters ed 80 centimeters. Sent'ins immediat ch'i vegn fitg bun cu la lantscha banduna il maun?
Gie, ualti spert less'jau di. Natiralmein n'èsi betg simpel da vesair quai da davos, cunquai ch'ins è lunsch davent. Ins vesa dentant nua ch'ils 50 meters èn e lu pons di direct ch'i è i bain. Plinavant sent'ins era sch'i ha funcziunà.
Quest'onn è stà fitg spezial fin quà. La fin zercladur avais bittà per l'emprima giada la lantscha sur 50 meters, sco emprima Grischuna insumma. Dacurt vegnida 5avla als campiunadis europeics sut 20 onns. Uss campiunessa svizra. Co pon ins declerar quai ch'i è ì uschè bain ils ultims mais?
Declerar quai è fitg grev. Schon mo chattar ils dretgs pleds n'è betg simpel, perquai sch'i va simplamain si è quai il pli bel e grond per insatgi che fa sport: Ins trenescha ed investescha temp e suenter funcziuni.
Jau crai il campiunadi europeic, ni era uss il campiunadi svizzer ha dà energia ch'ins na survegn uschiglio betg. Quai motivescha e mussa ch'i constat e ch'i va en la dretga direcziun. E jau crai cun il grond plaschair ch'jau hai vid il sport va tut anc bler pli simpel.
L'ultim onn n'è betg mo stà simpel. Vus avais gì long-Covid durant in onn e mez (cun stancladad permanenta e da betg pudair sa concentrar). E tuttina essas vegnida questa stagiun cun prestaziuns enormas. Avais ussa forsa anc pli grond plaschair da las prestaziuns?
Insaco segir. Quai temp ha mussà ch'ins na po betg adina far quai ch'ins fa gugent, era sch'ins faschess gugent.
E cu ti dastgas suenter, ir suenter a tias finamiras cun campiunadis europeics e campiunadis svizzers, è quai schon insatge fitg grond. Perquai ston ins magari schon star airi e realisar nua ch'ins è insumma e tge ch'ins ha tut fatg. E betg vulair adina dapli, quai ch'è gea bler il cas en il sport.
Ils 52 meters ed 80 centimeters als campiunadis svizzers muntan era il numer sis en Svizra da tut il temp e quai cun 19 onns. Mo tschintg atletas svizras han insumma ina giada bittà pli lunsch la lantscha. Realisais gia quai?
Anc betg, na. Quai stat gea atgnamain mo insanua sin in palpiri. Jau crai a la fin da la stagiun vegn quai lura pli conscient. Dentant cu jau hai bittà la lantscha n'è quai betg vegnì endament, gist sco emprim. Ma quai dat er puspè extra motivaziun ed energia ch'ins è ina da las meglras Svizras da tut il temp. E quai malgrà ch'jau sun gea atgnamain anc ina atleta sut 20 onns.
L'intervista cun Selina Capaul ha fatg Gian Carlo Candinas.
