Per l'emprima giada insumma ha lieu in campiunadi mundial da ballape en trais pajais. En ils Stadis Unids vegn giugà en 11 stadions, en il Mexico han il gieus lieu en 3 stadions ed en il Canada en 2. Suenter il campiunadi mundial en il Qatar, nua che tut ils stadions eran damanaivel in da l'auter, datti puspè gronds viadis per ils teams.
Uschè grond sco anc mai e nov modus
Igl è il campiunadi mundial da la superlativa – per l'emprima giada sa participeschan 48 teams, uschè blers sco anc mai. Quai ha per consequenza ch'il dumber dals gieus s'augmenta sin 104. Perquai dura il turnier era pli ditg che las ediziuns passadas. Il gieu d'avertura tranter il Mexico e l'Africa dal Sid ha lieu ils 11 da zercladur, il final ha lieu ils 19 da fanadur a New Jersey.
Cun 48 naziuns participantas ha la Fifa er stuì reflectar insatge pertutgant il modus. Da las 12 gruppas da la fasa da gruppas vegnan mintgamai l'emprim da la gruppa ed il segund da la gruppa vinavant. Vitiers vegnan ils 8 megliers terzs da la gruppa. Quels 32 teams giogan lura ils 1/16-finals, era questa runda è in novum a campiunadis mundials da ballape.
Ballape mo durant la notg?
Perquai ch'il turnier ha lieu en trais pajais ed en differentas zonas da temp, cumenzan las partidas da differents temps. Ils fans europeics dal ballape ston era sa preparar sin intginas uras senza sien. La buna novitad ord vista svizra: tut ils trais gieus da gruppa da la naziunala han lieu a las 21:00 temp svizzer. Pir durant la fasa da K.o. smanatschan partidas durant la «notg».
Sper las uras nocturnas è era nov che tar tut ils gieus dal campiunadi mundial vegn fatga durant tuttas duas mitads ina pausa da baiver da trais minutas che duai servir a la protecziun dals giugaders. Ultra da quai vegn quella pausa però era duvrada da purschiders da televisiun per ina pausa da reclama. Plinavant smanatschan interrupziuns pli lungas, sch' i dat in urizi en la vischinanza d'in gieu. Gia tar il campiunadi mundial dals clubs la stad passada èn partidas vegnidas interruttas per part per pli ditg.
E tge fa la squadra naziunala?
La squadra naziunala da la Svizra viagescha l'entschatta da zercladur en ils Stadis Unids da l'America. Pli precisamain a San Diego, nua ch'il team vegn a star durant il turnier. Ils 6 da zercladur datti anc in gieu da test cunter l'Australia. Serius vegni lura ils 13 da zercladur a Santa Clara cunter Qatar. Ils ulteriurs gieus en la gruppa B gioga la naziunala ils 18 da zercladur a Los Angeles cunter la Bosnia-Herzegovina ed ils 24 da zercladur a Vancouver cunter il Canada.
Ed ils favurits?
L'Argentina parta sco defensura dal titel, in ulteriur titel da campiun mundial fiss dentant surprendent, quai tranter auter en consequenza da plirs giugaders ferids.
Sco top-favurits valan actualmain la Spagna e la Frantscha, schanzas avessan però er il Portugal e l'Engalterra. Auters cun speranza sin il titel èn sco adina la Brasilia e la Germania.