L'onn 2024 è stà tut auter ch'optimal per Vital Albin (27). Pliras giadas è el vegnì frenà da malsognas u lura era d'ina scurlattada dal tscharvè e la finala era cun sintoms d'in surtrenament. Vital Albin ha lura era midà trenader e cun Dennis Van Winden, in anteriur ciclist professiunal da l'Ollanda, è el sa preparà bain sin quest onn.
Ch'el è sin la dretga via mussan in sisavel ed in novavel rang en cursas da la cuppa mundiala. Consequentamain ha el cuntanschì ils criteris per la qualificaziun per ils campiunadis mundials a Crans-Montana dals 30 d'avust fin ils 14 da settember 2025. Vital Albin è in da set Svizzers ch'è a la partenza a las duas cursas da short track e cross country. Igl è la novavla giada ch'el po sa participar a campiunadis mundials da mountainbike, suenter ch'el ha manchentà quels l'onn passà. Sper trenaments e cursas sin aut nivel ha Vital Albin dal reminent fatg il Bachelor en giurisprudenza il zercladur passà.
FMR: Vital Albin, tge munta la qualificaziun per ils campiunadis mundials per Vus?
Vital Albin: Quella munta fitg bler. Ella è stada la gronda finamira quest onn. L'onn passà n'ha insumma nagut vulì reussir. La selecziun mussa ch'jau sun puspè qua e tutg tar ils megliers Svizzers. Jau avess gì grondas miserias, sche la qualificaziun na fiss betg reussida ussa, era sche il team svizzer è il mument fitg bun.
Co è la furma trais emnas avant ils campiunadis mundials e tge muntan campiunadis mundials en l'agen pajais?
En sasez hai jau realisà pir las davosas emnas ch'igl è insatge tut spezial d'avair campiunadis mundials en l'agen pajais. L'attenziun è bler pli gronda e las medias sa chapescha fitg interessadas. Blers Svizzers vegnan ad esser tranter ils aspectaturs, quai che dat sa chapescha anim. Tgi sa, forsa è quai la davosa giada ch'jau poss esser a la partenza da campiunadis mundials en Svizra. A Lai l'onn 2018 sun jau partì en la categoria sut 23 onns. Esser ussa a la partenza da l'elita en l'agen pajais è sa chapescha insatge tut auter.
Ussa essas Vus stads duas giadas sut ils emprims diesch a cursas da la cuppa mundiala. Èn sumegliantas rangaziuns realisticas a Crans-Montana?
Quai è grev da dir. Las davosas cursas n'èn betg reussidas uschè bain a mai. Ussa hai jau dentant gì temp da trenar bain. La finamira è segir da pudair sa rangar en ils top diesch. Che quai è pussaivel hai jau mussà quest onn. La fin d'avust èn cursas da la cuppa mundiala en Frantscha anc sin il program. Quellas vegnan a mussar nua ch'jau stun.
Il fanadur 2024 avais Vus midà trenader. Tge ha quella midada purtà a Vus?
Nus avain midà fitg bler vi dal trenament e quai è stà bun per mai. La qualitad da trenar è meglra. La collavuraziun cun il trenader Dennis Van Winden è fitg stretga. Jau poss dir co jau ves ils trenaments. Ensemen cun el chatt jau lura ina buna soluziun. I n'è betg pli uschia ch'il trenader dictescha il plan da trenament. El è stà sez ciclist da professiun ed ha la chapientscha per soluziuns cura ch'jau sun stanchel.
La collavuraziun cun il trenader Dennis Van Winden è fitg stretga.
Igl è la novavla giada che Vus As participais a campiunadis mundials. Quant fitg pudais profitar a Crans-Montana dals auters campiunadis?
Da quai na poss jau betg profitar exnum. Jau sai tge che spetga e co l'organisaziun vesa ora. Las cursas sco talas èn sco quellas da la cuppa mundiala. Il spezial è che nus essan là sco equipa svizra e cun in auter team da persunas che sustegnan nus. Quai fa quels campiunadis mundials variants e spezials, surtut era ils muments che nus essan da cumpagnia.
Cun 27 onns avais Vus probablamain anc bain inqual finamira sportiva, èn ils Gieus olimpics da stad 2028 a Los Angeles era ina da quellas?
Pudair sa participar a gieus olimpics è in siemi. Sche quella finamira daventa realitad, dependa da differents criteris. Damai che sulettamain dus Svizzers pon sa qualifitgar per ils gieus, dovra quai en mintga cas ina victoria en ina cursa da la cuppa mundiala ils proxims dus onns. Jau lavur dentant per quella finamira.
RTR rapporta da concurrenzas da bike sco il Swiss Epic u il Cape Epic ma er d'atletas ed atlets grischuns cun ambiziuns pli grondas u pli pitschnas sin il bike.
Ina purschida per tut ils fans da mountainbike: rapports, contribuziuns e tips.