Siglir tar il cuntegn

Header

cuntegn

Cunter il davos da la tabella Il HCD batta ils Tigers

Giugaders dal HCD vid giubliar
Legenda: HCD cunter l'adversari preferì Er il quart duel da questa stagiun gudogna Tavau. Keystone

Durant ils emprims dus terz ha il HCD dominà il gieu cleramain. Chris Egli e Marc Wieser han sajettà gia en las emprimas 11 minutas ils dus gols per ils Grischuns. Silsuenter han ils attatgaders dentant disditg savens avant il gol dals Tigers. Trais giadas han els tutgà pitga u latta. Il resultat da 2:1 suenter 40 minutas, bler memia stretgs. La statistica da sajets 27:11 per Tavau.

En l'ultim terz ha il HCD pers la dominanza dal gieu. Ils SCL Tigers han pudì tegnair pitg ed han gì inqual schanza d'egualisar. Pir paucas secundas avant la fin ha l'American Aaron Palushaj decis il gieu cun il 3:1 en il gol vit.

audio
Enzo Corvi davart il gieu
ord Novitads dals 24.02.2021.
laschar ir. Durada: 14 Secundas.

Grazia a la victoria è Tavau da nov sin plaz 5 da la tabella ed uschia sin in plaz da playoff. Vinavant vai per Tavau venderdi, puspè a chasa, cunter Fribourg-Gotteron.

Per ils SCL Tigers èsi stà la novavla terrada en seria. Els restan cleramain a la cua da la tabella.

Emprim terz

  • 9' Chris Egli (Lorenz Kienzle, Simon Knak) 1:0
  • 11' Marc Wieser (Magnus Nygren) 2:0
  • 13' Ben Maxwell (Anthony Huguenin) 2:1

Segund terz

  • Nagins gols

Ultim terz

  • 60' Aaron Palushaj 3:1

Avant il gieu

Il HCD sto actualmain desister d'inqual giugader da tschep pervia da blessuras u serradas:

  • Andres Ambühl,
  • Yanick Frehner,
  • Teemu Turunen,
  • Claude-Curdin Paschoud,
  • Dino Wieser,
  • Fabrice Herzog

En il davos gieu cunter Zug han ins constatà che Tavau na vegn betg da zuppentar quest fatg. Cun 2:7 ha il HCD pers a chasa. Davent dal cumenzament fin la fin ha l'equipa da Christian Wohlwend gì nagina schanza.

La buna nova: Il defensur Felicien Du Bois dat oz ses comeback e ses emprim gieu da la stagiun. Quai suenter ina lunga pausa pervia d'ina blessura.

Trais puncts ston nà

Ils SCL Tigers èn cun gronda distanza a la cua da la tabella. Ils Bernais han mo gudagnà 8 da 38 gieus fin qua. Ils ultims 8 gieus han els pers tuts. Uschia è Tavau, malgrà intginas blessuras, il grond favurit. Cun ina victoria han ils Grischuns er la schanza da puspè far il pass sin ina plaz fix per ils playoffs. Actualmain èn els sin plaz 7, ina plaz che lubescha da dar ils pre-playoffs.

RTR novitads 20:00

Artitgels legids il pli savens