Dapi l’enviern 2023/2024 èn tschairas da fluor scumandadas per tut las concurrenzas da sport d’enviern. La FIS, la Federaziun internaziunala da skis, ha introducì il scumond l’emprim sin livel da la cuppa mundiala. Pli tard han er ils organisaturs dad occurrenzas popularas, sco il Maraton da skis engiadinais scumandà la tschaira da fluor.
Dapi il Maraton 2024 controlleschan ils organisaturs da la pli gronda cursa populara da la Svizra sche curriduras e curridurs dovran anc tschaira da fluor. En cas d’in test positiv, vegnan quella curridura u quest curridur disqualifitgads e suspais per dus onns da tut las cursas dal Maraton da skis engiadinais.
Per l’emprima giada metta la federaziun da skis svizra, Swiss Ski, en il rom dal Maraton da skis engiadinais a disposiziun la pussaivladad da laschar controllar ils skis sin restanzas da fluor. Gist sper la Chamona engiadinaisa datti in center da test sin tschaira da fluor, nua ch'ins po laschar testar ils skis.
L’indriz per testar è ina sort valischa che bitta radis infracotschens sin trais puncts dal ski. Sche la concentraziun da fluor è pli gronda ch'in pertschient è il ski contaminà e na po betg vegnir duvrà per far la cursa.
Controllas sporadicas era durant quest Maraton da skis engiadinais
Era durant las cursas da quest on vegnan ils organisaturs da las cursas dal Maraton da skis engiadinais a controllar sporadicamain ils skis da curriduras e da curridurs dal maraton.
Segir vegnan controllads ils skis dals pli sperts. Dentant era da persunas nua ch'ins ha il sentiment ch'il ski va pli spert che quel da las concurrentas e dals concurrents che curran il maraton sin il medem livel.
En tscherts puncts da la cursa vegn quai a dar controlladers che guardan sin l’effect dals skis. Tut tenor vegnan las persunas nua ch'igl è evident ch'ils skis marschan pli spert che quels da la concurrenza controlladas. E tar in resultat positiv – disqualifitgadas e suspaisas dal Maraton.