La Grischuna Livia Peng è daventada il numer 1 da la naziunala svizra e tutga, tenor inqual expert, tar ina da las meglras golias dal mund. Si'affecziun per il sport da ballape ha cumenzà baud, sin il plaz da ballape a Domat.
Cun otg onns ha ella survegnì regalà da ses padrin ils emprims vons da goli ed a partir da quest mument n'ha Livia Peng betg pli vulì bandunar la posiziun tranter las duas pitgas. «Jau sun ida en gol ed hai ditg als buobs da sajettar e dapi quest mument sun jau golia.»
Fin ch'ella aveva 17 onns, ha ella trenà per gronda part cun buobs e giuvens. Sch'ella guarda oz enavos, haja quai gidà ad ella da sa far valair.
| 2009-2014 | CB Domat |
| 2014-2019 | Team da la Svizra Sidorientala |
| 2019-2022 | FC Turitg |
| 2022-2023 | BK Häcken |
| 2023 | UD Levante |
| 2023-2025 | Werder Bremen |
| 2025- | FC Chelsea |
Cun 23 onns ha ella gia dà ballape per differents clubs. En Svizra per Turitg, en Svezia tar Häcken, en Spagna tar Levante ed ils dus ultims onns tar Werder Bremen en la Bundesliga tudestga. Sin il cumenzament da proxima stagiun mida ella tar il FC Chelsea en l'Engalterra. Dal reminent ina da las meglras equipas dal mund.
Siemià dad esser il numer 1
Ses siemi da daventar il numer 1 da la naziunala svizra è daventà, suenter in vi e nà, realitad. Ditg n'èsi numnadamain betg stà cler sche ella u sche Elvira Herzog vegnia ad esser la golia da tschep durant l'EURO en Svizra. La finamira da daventar in di golia da la Svizra haja ella gì davent dal mument ch'ella haja cumenzà a dar ballape.
La golia da Domat è ina persunalitad che viva per l'esser golia. Quai ha ella adina puspè raquintà en intervistas. Ella è er enconuschenta sco fitg ambiziusa e focussada che sa exact tge ch'ella vul. E plinavant è Livia Peng er ina golia da rituals.
Gievgia saira (21.00) dat la Svizra il terz gieu da gruppa da l'EURO 2025. In pari encunter la Finlanda e la qualificaziun per ils quartfinals è dumagnada. Livia Peng vegn er en quest gieu ad esser en gol tar la naziunala svizra.
Livia Peng persvada
En ils emprims dus gieus da gruppa encunter la Norvegia ed encunter la Islanda ha la golia grischuna persvas. Spezialmain cun sia quietezza. Bleras paradas n'ha ella betg stuì mussar, ma ella ha giugà cun bain e persvada er en il gieu cun il pe. Er tar bals auts ha ella mussà sias fermezzas. Sulettamain tar in cuntergol encunter la Norvegia, suenter ina corna, n'ha ella betg fatg la meglra figura.
Uschia ha ella gia tradì en in'intervista ch'ella dormia adina cun in pèr vons da goli sut il plimatsch, sa chapescha mo vons novs. Quai è in ulteriur segn che mussa che la sportista da 23 onns è ina che na va betg mo suenter ad ina professiun, mabain ch'ella viva sco golia da ballape era ses siemi.