Cun in’ulteriura victoria questa saira, ordaifer encunter Wil, pudess il Club da hockey Partenz-Signuradi far tut cler e gudagnar il campiunadi d’emprima liga da la Svizra Orientala. Suenter il 4:1 ed il 7:4 mainan ils Partenzers la seria da final da best-of-five cun 2:0.
Ina rolla centrala en l’equipa dal Partenz gioga er il Sursilvan Dario Caduff. Dapi quatter onns è el goli tar l’equipa ch’è adina en la sumbriva dal grond vischin, il HCD. Caduff aveva gia lantschà, avant bun 20 onns, sco junior sia carriera tar il Partenz-Signuradi. Silsuenter ha sia via manà sur pliras staziuns – tranter auter era tar l'EHC Arosa ed l'EHC Cuira.
Ses fieu brischia anc adina per il hockey ed el na pondereschia franc anc betg da chalar, manegia Dario Caduff ch’ha 31 onns ed è dapi intgins onns scolast primar a Sagogn. Sper il hockey giaudia el cunzunt il bun spiert en l’equipa, la vita en la gardaroba sco era dasper il hockey cun ils amis da squadra.
Per il mument saja il focus dentant cumplainamain sin il hockey. Ils playoffs sajan in bun temp, ma pli intensiv che la fasa da qualificaziun. Durant quest temp vivia mintgin in zic pli professiunal, declera il goli Caduff.