Siglir tar il cuntegn

Header

Vista sin l'areal d'ina cursa da passlung.
Legenda: Cursas dal Tour de ski en grategiadas RTR, Roman Dobler
cuntegn

Organisaturs cuntents Spectacul sin loipa, nagins problems sper loipa

Gist trais dis èn ils megliers passlunghists dal mund stads per las cursas dal Tour de ski en Val Müstair. En il lieu che ha organisà gia per la tschintgavla giada cursas dal Tour de ski èn ins cuntent.

Las trais cursas dal Tour de ski en Val Müstair han mussà ch'igl è pussaivel dad organisar cursas da la cuppa mundiala era sut cundiziuns da corona. Bler han ils organisaturs stuì far auter questa giada. Uschia separar strictamain las atletas ed ils atlets dal rest dal manaschi enturn la cursa. Suenter trais dis bilantschescha il president dal comité d’organisaziun, Guido Mittner: «Tut e gartegià tenor giavisch.»

Bolshunov ina classa, Cologna cun segn d’exclamaziun

Sin loipa han ils passlunghists da la Russia procurà per la musica. Totalmain èn las atletas ed ils atlets da la Russia stads sis giadas sin il podest. La gronda figura ha num, Alexander Bolshunov. Il grond favurit sin la victoria dal classament general dal Tour de ski ha decis duas cursas per sai.

Ina stupenta cursa ha dentant era mussà il matador local, Dario Cologna. Suenter Bolshunov ha Cologna terminà la cursa da 15 kilometers en il stil classic sin plaz dus. Cun questa plazza da podest, l’emprima en sia patria la Val Müstair, ha Cologna gist er fatg in regal als organisatur da la cursa da giubileum.

Persvas ch'il Tour de ski en Val Müstair continuescha

Era sche l’organisaziun dal Tour de ski n'ha anc betg ils contracts per ina proxima ediziun – è il president dal comité d’organisaziun Guido Mittner persvas, che la Val Müstair organisescha er en futur cursas da quest gener. La buna organisaziun da las cursas da quest onn sut cundiziuns da corona èn la meglra carta da visita per cuntinuar la collavuraziun cun la Val Müstair era en il futur.

RTR actualitad 07:00

Artitgels legids il pli savens

Scrollar a sanestra Scrollar a dretga