Siglir tar il cuntegn

Header

audio
La naziunala svizra persvada
Or da Actualitad dals 31.12.2021.
laschar ir. Durada: 4 minutas 32 Secundas.
cuntegn

Revista 2021 Euro 2020 – il meglier turnier da la naziunala dapi il 1954

Cun la victoria en la lutga da penaltis encunter la Frantscha ha la naziunala Svizra fatg bun in mantun tar l’Euro 2020. Cun quest gieu ha la naziunala fatg il pass en ils cors dals fans.

  • Pervia da la pandemia da corona è era l’Euro da ballape vegnida spustada sin il 2021. Cun in on retard ha il turnier tuttina giu lieu en diesch pajais da l’Europa. La naziunala Svizra e stada l’equipa che ha stuì far ils pli lungs viadis enturn il continet. Perquai ha l’equipa dal trenader Vladimir Petkovic savì s’installar durant il turnier a Roma. Per la naziunala era questa Euro in fitg bun turnier. Per l’emprima giada dapi il 1954 ha la Svizra savì qualifitgar per il quart final. Sin via tar quel ha la Svizra batti il campiun mundial actual – la Frantscha.
  • Cumenzà ha l’Euro 2020 per la naziunala Svizra cun dapli lingias grassas sper il pastget che sin il plaz da ballape. Ils giugaders da la naziunala han procurà pervia da lur autos da sport per ils emprims chavazzins. Sin il plaz da ballape era l’emprima prestaziun encunter Wales modesta e la sconfitta a Roma encunter il futur campiun d’Europa, l’Italia in debachel. Betg perquai che la Svizra aveva pers cun 0:3, dentant pervia da la prestaziun da l’equipa naziunala ch'era da l’entschatta fin a la fin fitg flaivla.
  • Suenter il pari e la terrada ha la naziunala alura stuì batter en l’ultima partida da gruppa la Tirchia per esser da la partida en la runda da k.o. - e quai ha la naziunala alura era fatg a moda suverana.
  • En l'otgavelfinal èsi alura vegnì tar il duel cun il grond favurit, la Frantscha. Quai è segir stà il meglier gieu da la naziunala dals davos onns. L’equipa dal trenader Vladimir Petkovic ha mussà bler caracter. Suenter che la Svizra era cun 1:3 en retard encunter la Frantscha ha la Svizra anc egualisà il gieu. Uschia è quai vegni a la lutga da penaltis nua ch'il goli Yann Sommer ha tegni il penalti decisiv dal superstar Kylian Mbappe. La Svizra era en il quartfinal.
  • L’emprim la Frantscha alura la Spagna. Omadus grondas equipas, omadus equipas han gia savì festivar il titel da campiun mundial, ni campiun d’Europa. Suenter la sensaziun encunter la Frantscha èsi era vegnì en il duel encunter la Spagna ad ina lutga da penaltis. Questa giada dentant cun la meglra fin per la Spagna. La Svizra ha pers il gieu dad quart final e tuttina ha l’equipa savì turnar cun blera superbia enavos a chasa. Per l’emprima giada dapi quasi 70 onns è la naziunala da ballape vegnida ad in campiunadi d’Europa uschenavant sco tar l’Euro 2020.

RTR actualitad

Artitgels legids il pli savens