Ils passlunghists norvegiais han dominà a moda impressiunanta la cursa da la cuppa mundiala sur ils 10 kilometers stil liber a Tavau. Sco gia a Trondheim sur la medema distanza ha gudagnà Einar Hedegart. La finala è l’atlet da 24 onns stà bun 11 secundas, respectiv 18 secundas pli spert che ses cumpatriots Harald Oestberg Amundsen e Mattis Stenshagen. Manchentà be per pauc il podest ha sco quart il grond star Johannes Hoesflot Klaebo. Sut ils emprims otg èn classads gist set Norvegiais.
Ord vista svizra hai dà ina gronda trumpada. Nicola Wigger è il sulet ch’è sa classà sut ils megliers 50, quai sco 48avel cun in retard da 1:45 minutas. Dals Grischuns è Roman Alder da Puntraschigna stà il pli spert sco 67avel.
Il Tujetschin Cla-Ursin Nufer ch’è partì per l’emprima giada ad ina cursa da la cuppa mundiala dapi bun trais onns e dapi sia diagnosa da surtrenament – ha mussà ina stupenta cursa e terminà quella sco 70avel, cun in retard da 2:20 minutas sin il victur Einar Hedegart.
Betg ì sco giavischà èsi als frars Noe ed Isai Näff ch’èn stads exact tuttina sperts e classads sin las plazzas 80 ed 81 da total 123 curriders.
Anja Weber è la suletta Svizra ch’ha persvadì
Ina victoria norvegiaisa hai er dà en la cursa da las dunnas sur 10 kilometers en il stil liber, quai entras Karoline Simpson-Larsen ch’ha triumfà avant la Svedaisa Moa Ilar e la Norvegiaisa Astrid Oeyre Slind.
Meglra svizra è stada Anja Weber. La Turitgaisa è vegnida 16avla cun in dischavantatg dad exact ina minuta. Sut las top 30 è anc sa classada Nadine Fähndrich sco 29avla. Las curridras grischunas èn sa rangadas sco suandant: Marina Kälin da San Murezzan è vegnida 35avla, Alina Meier da Tavau 37avla, Fabienne Alder da Puntraschigna 39avla, Giuliana Werro da Zernez 42avla e Désirée Steiner da Tavau ha stuì sa cuntentar cun il 63avel plaz.
Proxima staziun: Tour de Ski
Uss fa la cuppa mundiala da passlung pausa per duas emnas avant ch’i cuntinuescha ils 28 da december a Toblach cun il Tour de Ski. Quel va lura a fin ils 4 da schaner en la Val di Fiemme, là nua ch’i vegn cumbattì il favrer per las medaglias olimpicas.