Ils gieus olimpics il favrer en la Val di Fiemme, quels èn la gronda finamira da passlunghistas e passlunghists da la cuppa mundiala en questa stagiun. Uschia er quella da Giuliana Werro da Zernez. Per ella fissi ina premiera. La via saja però lunga e dira, dentant betg nunrealistica, uschia la sportista engiadinaisa ch’ha pudì trenar fitg bain durant la stad ed er il davos mais sin la naiv. La furma constat e perquai è ella er vegnida nominada da Swiss Ski per las emprimas cursas da la cuppa mundial la fin november a Ruka en Finlanda.
Il studi sto uss far plaz al sport
Giuliana Werro aveva dà ses debut en la cuppa mundiala il 2020 a las cursas da chasa a Tavau. Durant quels davos tschintg onns ha la victura dal maraton da skis engiadinais 2023 dastgà sa participar a bun 20 cursas. La stagiun passada haja ella pudì far ina pluna experientschas, ma ella haja er fatg divers sbagls.
L'atleta haja dentant emprendì in mantun ed en quella stagiun spera Giuliana Werro da propi dastgar parter regularmain a cursas da la cuppa mundiala, uschia l’Engiadinaisa da 26 onns. Dasper il sport studegia Giuliana Werro anc psicologia da sanadad, in studi ch’ella po far online. Durant la stagiun d’enviern metta ella dentant quest studi in zic da la vart, il focus è ils proxims mais cumplettamain sin il sport.