Tge che era per in dretg cowboy sia pistola è per il president american ses telefonin. Per lantschar novas ideas, attatgas u era mo per laschar ir petardas da fim che duessan distrair l’attenziun dad auters problems pli acuts, dovra il president american Donald Trump il telefonin ed ils 280 segns che Twitter porscha. Problems ha’l per il mument detg avunda: in tribunal en California ha bloccà ses plans per in mir al cunfin cun il Mexico, collavuraturs bandunan la Chasa alva e pervi dal famus «quid pro quo» en Ucraina ha’l in «impeachmant» al culiez. Trump ha ditg ina giada da sasez: «Jau sun il Hemingway dals 280 bustabs». Tgi sa tge ch’il grond scriptur Ernest Hemingway, l’autur da cudeschs sco «True at First Light» (La vardad a l’emprima glisch dal di), schess da quel congual?
