2. stafla «L'ultim Rumantsch» - Premiera da film al Festival da film a Turitg

La mesemna saira ha gì lieu la premiera da la 2. stafla da «L'ultim Rumantsch» al Festival da film a Turitg. A partir dals 12 da november 2025 pon ins lura guardar l'entira seria sin Play RTR e Play Suisse.

«L'ultim Rumantsch» al Festival da film a Turitg

Per tge vai en la 2. stafla?

En il center da la segunda stafla da «L’ultim Rumantsch» stattan las dispitas da la famiglia Durisch, possessura e gestiunaria da la pli gronda chasa da medias dal Grischun. Gion (Marco Luca Castelli) zuppenta ils problems finanzials da la chasa da medias fertant che sia nezza Ladina (Annina Hunziker) publitgescha artitgels che mussan praticas dubiusas da famiglias grischunas. Andrietta (Marietta Jemmi), la mamma da Ladina emprova d’in maun da salvar il num da la fatschenta da famiglia e da l’autra vart er da carmalar enavos en il manaschi sia figlia Ladina.  

Sin ils fastizs d'in misteri da famiglia

Pervia dal management mal da Gion crodan las maschinas da squitschar or en la chasa da medias ed uschia vegn l’entira fatschenta en ina situaziun precara. In conglomerat da medias ester smanatscha da surpigliar la chasa da medias pervia dals problems finanzials.

Gion ed Andrietta èn occupads cun il manaschi durant che Ladina scuvra in secret da famiglia. Ensemen cun Corsin (Noam Jenal) ch’è stà schefredactur da la «Posta», cumenza ella a far retschertgas che mainan els enfin a Genua.   

Acturas ed acturs  

Las rollas principalas en la segunda stafla han vinavant Annina Hunziker sco Ladina e Marietta Jemmi sco Andrietta Cadonau, la mamma da Ladina. Marco Luca Castelli gioga Gion Durisch e Noam Jenal è Corsin, l’anteriur schefredactur da la «Posta». En ulteriuras rollas èn tranter auter da vesair Andreetta Nogler, Felicitas Heyerick, Catriona Gugenbühl, Roman Weishaupt, GinaEstrada, Tim Theus e Nikolaus Schmid. 

La seria en tschintg parts è vegnida producida da Sophie Toth ed Aminta Iseppi da l'interpresa shining nice da Turitg en coproducziun cun Manuel Sieber da l’interpresa schau. GmbH da Cuira. Uschia vegn la collavuraziun da las duas producziuns da l’emprima stafla cuntinuada ed approfundada. La reschia maina puspè Adrian Perez. Aaron Markus Graf è sco gia en l’emprima stafla responsabel per las lavurs da camera. Ils scenaris èn vegnids sviluppads en il Writer’s Room dals auturs Adrian Perez, Jen Ries e Simon Nagel.

Stafla 1: dispita davart l'ierta

Cura ch'il patrun e fundatur da la chasa da medias mora, cumenza in cumbat da pussanza entaifer la famiglia. En ses testament ha Gion-Peder (Elmar Deflorin) resguardà sia biadia Ladina (Annina Hunziker) che a Turitg. Ladina è in'activista incharnada che s'engascha per ils dretgs dals animals e la protecziun dal clima – tematicas che fruntan sin resistenza en la chasa da medias tradiziunala. Ma gist ella duai ussa manar la «Posta», l'ultima gasetta rumantscha. 

Tut sin in clic: l'emprima stafla da «L'ultim Rumantsch»

Questa davosa veglia da Gion-Peder na plascha tuttavia betg a ses figl Gion che vul serrar la «Posta» nunrentabla. Ladina nizzegia la chaschun da plazzar ses cuntegns en l'atgna gasetta. Ma gia prest sa chatta ella amez in morast d'intrigas e cumbats da pussanza. Per pudair publitgar ses messadis tradescha ella pass per pass ils agens ideals. A la fin dal cumbat sto Ladina guardar en ils egls a sasezza, a sia famiglia ed a la populaziun rumantscha.