Per dar ina survista da la lavur prestada guarda l'Artg musical enavos sin las registraziuns da chors che RTR ha fatg l'onn 2023. Danovamain hai dà bleras occurrenzas e concerts da chors nua che RTR ha pudì installar ses microfons. Tranter auter er a duas festas districtualas da musicas ed ina festa districtuala da chant.
Emprima part: chant
Sper la festa districtuala da chant a Müstair ha RTR per l'emprima giada era fatg registraziuns da tun e maletg per noss chors grischuns. Numerus chors èn stads il mars 2023 a Flem per perpetnisar lur chant en in video ch'è da vesair sin PlayRTR u sin Youtube.
L'Artg musical sa regorda dentant era dal giubileum da 30 onns Cor Proget u dal project «Rieischs surmiranas» ch'il Chor viril Surses ha pudì realisar. Ultra da quai avain nus registrà l'ultim concert dad Aita Biert e Men Steiner ch'han dà adia a la tribuna suenter in mez tschientaner.
Segunda part: musica instrumentala, populara ed orchester
Era per musicas instrumentalas e furmaziuns da musica populara ha RTR offrì l'onn passà per l'emprima giada registraziuns da tun e maletg. L'interess, en spezial da chapellas da musica populara, è stà grond.
Cun musicas instrumentalas avain era pudì far registraziuns a chaschun da las festas districtualas a Claustra e Val S. Pieder. A Val è er anc stada la festa chantunala da musicas giuvenilas. Nus avain però era registrà in dals concerts da l'ultima turnea da stad dal Calamus Trio ed era registrà ils concerts finals da las emnas da musica da la JBBG (Jugend Brass Band Graubünden) e dal JUSI (Jugendsinfonieorchester Graubünden).
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
