(sursilvan) Carstgauns van bugen a festivals. Jeu era.
Anflar il dretg liug per guder dus ni treis dis quei sentiment da libertad, ei denton gnanc schi sempel.
Mo tgei festivals fan bein a mi ed a mia olma e tgeinins buc?
Jeu lavurel sco booker. Jeu «vendel» differentas artistas e differents artists per openairs ed occurrenzas. La stad ei stagiun aulta. Mintga fin d’jamna dat ei plirs concerts, nua ch’jeu sun savens sez sil plaz per coordinar denter ils acts ed ils organisaturs.
Ils suandonts maletgs tipics ein probablamein enconuschents a tuttas e tuts ch’ein gia stai ad in festival: stuornadad, substanzias illegalas, carplinas, sepitgems, zonas per las «veramein-impurtontas-persunas», rumians e cups pil plaun entuorn e dapertut sponsurs e reclamas da firmas che fan crescher il spieghel d’insulin mo da mirar sisu.
Quei ei buca circumstanzias che fan bein all’olma. Miu meini.
Ei va era senza. Senza tissi. Stupent. Per mei ei quei stau in absolut highlight ed ina experientscha positiva en in mund ch’ei focussaus sin consum e profit.
La davosa fin d’jamna sundel denton staus cun in musicist al Pachamama el Surses. – In festival amiez las muntognas grischunas. E quei era total auter. Negin alcohol, neginas drogas, negin rumien e mintgin pren cun e lava giu l’atgna vischala. Negina security, negins sponsurs. Rodund duamelli persunas, famiglias, tats e tattas e rodund 350 affons che currevan entuorn a pei blut.
Negin caos, negina agressiun. Ils hosps han tedlau la musica activamein, senza tschintschar ed han saltau sco sch’ei dess buc in damaun. Embratschau. Ris. Uras ed uras, plein energia ed amur, e quei tut senza alcohol e substanzias.
Quei ei definitivamein buc in festival che tschetscha sco usitau energia e lai aunc dis suenter anavos ils fastitgs el tgierp. Na. Quella fin d’jamna ha cargau si mias battarias. Ed jeu sun leds da saver dir: Ei va era senza. Senza tissi. Stupent. Per mei ei quei stau in absolut highlight ed ina experientscha positiva en in mund ch’ei focussaus sin consum e profit.
Ina fin d’jamna che ha fatg bein a mi ed a mia olma. Ei va pia era auter. Jeu giavischel a tuttas e tuts vinavon ina super sesiun da festivals e sai mo recumandar: Magari renda ei d’encurir empau pli ditg per in dretg liug da celebrar e festivar la veta.
