Uss, cura che vus avais gia guardà la nova episoda da la Show (u betg? uschiglio: clic sin il video qua sura) savais vus natiralmain che betg tut è rosas tar la promoziun dal sport. Tar il program «Giuventetgna e Sport» (J+S) duai vegnir spargnà, resp. l'import per participanta u participant ad in curs dad J+S duai vegnir reducì da CHF 1.30 sin CHF 1.04. Ina reducziun da 20%. Quai ha chaschunà in brav hallo e RTR ha rapportà.
Grischun cun grass
Per cumbatter quests plans (la decisiun croda pir durant la debatta da budget dal Parlament federal il december) vegn fatg bler canera però era appellà als chantuns da siglir en. Il Grischun fiss qua en ina buna posiziun: Per la promoziun da sport mussa il quint annual ina reserva da quasi 12 milliuns francs. Quella tanschess tar ina reducziun da daners per J+S da la Confederaziun per il Grischun da CHF 500'000 ad onn per 24 onns – per entiras carrieras da sport pia.
Natiralmain avais vus era vesì en l'episoda actuala da la Show (gugent in clic sin il video sura) che la promoziun da sport en il Grischun vegn spisgentada ord diversas funtaunas. Direct dal chantun va mintga onn uschia circa CHF 1 milliun en la promoziun da sport. Betg includì qua èn il sport da scola e la promoziun d'economia via la quala vegnan promovids era bajetgs da sport sco alas da glatsch.
La gronda funtauna per la promoziun da sport en il Grischun è quella da SWISSLOS: Mintga onn vegn da quai da CHF 4 milliuns francs dals total ca. 5 milliuns francs da la promoziun da sport entras il maun public en il Grischun da la Societad da lottaria svizra.
Schon ina giada sa dumandà tge curiusa paraid davostiers che quai è insumma da la show? E per quai pajain nus anc Serafe?
Igl èn ramas surtratgas cun taila che cuvran elements che maglian il tun. Aber atgnamain èsi ina part d'ina cuschina.
Ludopatia grischuna gida al sport
Quai che vus na savais betg malgrà che vus avais natiralmain gist guardà l'episoda actuala da la Show (NA? NAAA??? LURA CLIC SISUM SIN IL VIDEO GOFERTAMI!) è che SWISSLOS na reparta ils gudogns or da la lottaria als chantuns betg simplamain tenor dumber da la populaziun. Anzi dependa quai da quant che vegn giugà gieus da fortuna en mintga chantun.
E co ina pitschna evaluaziun da las cifras da SWISSLOS ed il dumber d'abitants per chantun muss: Il Grischun è en l'emprim terz dals chantuns.
SWISSLOS lavura dal reminent mo en ils chantuns da la Svizra tudestga, incl. il Grischun ed il Tessin. En Svizra franzosa è la Lotterie Romande (LoRo) activa. Ma tge dianter è uss questa «ludopatia»? Clic.
Daco insumma promoziun da sport? N'èsi betg privlus?
Ma guarda: Vus avais legì fin qua. Bravo! E bravo era per avair guardà la Show cun in clic sin il video sisum (jau na ditg nagut pli). La dumonda da basa è schont:
Pertge vegn insumma promovì il sport? E la resposta è lura gist era ina da basa. I porta insatge. Tenor studis datti en Svizra mintga onn custs da 5.3 milliuns en il sistem da sanadad pervia da memia pauc moviment.
Ma il sport ha era ses privels. La Suva registrescha ils accidents en il temp liber e notescha che 34% da tuts accidents en il temp liber capitan en connex cun sport.
La satira dat in'egliada frecha sin temas impurtants en nossa societad.
Da Domat e malcuntent?
Also primo: En puncto sport pon ins abitond a Domat gea mo esser pli che cuntent. Jau ditg be Peng e Capaul ! ! !
E secundo: questa giada hai gì insumma nagin spruch da Domat. Null. Nada. Niente.
Anc adina malcuntent? Tipic Domat halt. Per mimimi: Cliccar qua.
La registraziun en cuschina vegn sustenida da: Teddy!