Siglir tar il cuntegn

Header

Grafica cun bleras vopnas dal Grischun
Legenda: RTR
cuntegn

Decisiuns en vischnancas Tgi elegia, tgi dat credits e tgi reveda planisaziuns

RTR rimna las votaziuns da las vischnancas grischunas e dat ina survista da las decisiuns dals 15 da matg. Quella vegn adina puspè actualisada.

Flem

L’ustaria Foppa sur Flem resta averta per indigens e giasts. Il suveran ha cleramain approvà in credit da 4 milliuns francs per cumprar l’ustaria sur il vitg.

Plinavant han ils da Flem ditg Gea ad ina contribuziun dad 1,5 milliuns francs per la «Finanz Infra». Quella prevesa tranter auter indrizs d'ennavar, in'illuminaziun da la via da scarsolar e segirar las vias da bike e trottinet. Questas optimaziuns duain succeder en connex cun il remplazzament da la sutgera a Foppa entras il project «Flem Express».

Zernez

Zernez ha elegì Domenic Toutsch sco nov president communal. Suenter gia esser stà durant 9 onns president communal da Zernez, surpiglia el il proxim onn las mastrinas da la vischnanca fusiunada. Igl è stà in cler resultat. Domenic Toutsch vegn sin 498 vuschs. I suondan Fadri Guler cun 140 vuschs e Linard Martinelli cun 71 vuschs. Vitiers vegnan singulas vuschs. Domenic Toutsch succeda ad Emil Müller – quel surpiglia il presidi ad Egnach.

audio
Zernez: Domenic Toutsch è il nov president communal
aus Actualitad vom 15.05.2022.
abspielen. Laufzeit 4 minutas 5 Sekunden.

Glion

A Glion po il svilup da l’areal da la staziun cuntinuar. Passa 80% da las votantas ed ils votants da Glion han ditg Gea a la revisiun da la planisaziun locala, che lubescha da sanar cumplettamain l’areal. I va surtut per remplazzar il bajetg da la staziun da Glion. Vitiers vegn creada ina nova plazza per ils autos da posta. Quests projects fan part a l'entir svilup da la staziun, tranter auter avevan votantas e votants gia deliberà il 2018 in credit da bunamain 8 milliuns francs.

Lumnezia

Las Lumnezianas e ed ils Lumnezians din cun 620 cunter 131 cleramain Gea al credit da 5,2 milliuns francs per renovar las vias da meglieraziun en la vischnanca.

Medel

Il suveran da Medel/Lucmagn di Gea al credit per renovar las vias e las lingias da conduct aifer il vitg. Cun 145 cunter 8 vuschs han ils da Medel approvà il credit necessari da 4,4 milliuns francs. Igl è planisà da far il project da renovaziun en pliras etappas.

Mustér

La vischnanca da Mustér di Gea a la revisiun parziala dal plan da zonas «Scursalera Catrina». I va surtut per pussibilitar a las pendicularas da bajegiar ina scursalera en il territori da Caischavedra.

Sumvitg

Il suveran da Sumvitg di Gea al credit da 2,4 milliuns francs per sanar la Via Naustgel. Quella via da guaud ha bun 7 kilometers lunghezza. La radunanza communala ha gia approvà unanimamain il project.

Grüsch

Grüsch po bajegiar ina nova halla polivalenta sin l'areal da scola. Il suveran ha approvà il project cun pli che 81% da las vuschs e concedì cun quai in credit da 13,85 milliuns francs. La halla polivalenta vegn a servir sco halla da gimnastica per la scola, dentant era per differentas activitads da las uniuns dal vitg. Sch'i va tut tenor plan èsi previs da retrair il nov bajetg la stad 2025.

Schiers

La vischnanca da Schiers resta en il consorzi da scola – Fideris, Furna, Jenaz, Schiers. Las votantas ed ils votants han refusà la proposta da la suprastanza communala d'extrar dal consorzi. E quai cun in cler resultat da 478 Na cunter 257 Gea. La suprastanza da Schiers vuleva bandunar il consorzi da scola, suenter che las discussiuns da midar la clav da repartiziun dals custs dal consorzi n'avevan betg purtgà fritg.

Vaz/Obervaz

Il suveran da Vaz decida en favur dal campadi Gravas a Lai. Il campadi po far 27 plazs da campar – e vitiers construir ina nova chasa da manaschi. Il suveran da Vaz ha approvà cun var 77% da las vuschs, la revisiun da la planisaziun locala. Ils novs plazs da campar remplazzan auters – che sa chattan en ina zona da privel d’aua, e na dastgan betg pli vegnir duvrads. Il campadi po puspè porscher tuttina bleras plazzas (en total 126).

Arosa

Arosa po far la revisiun parziala da la planisaziun locala dal territori da skis Arosa Ost. Cun 530 Gea cunter 505 vuschs èsi stà ina stretga decisiun. Cun reveder la planisaziun locala vul Arosa optimar la purschida per il sport d'enviern en il territori da Tschuggen. Tranter auter èsi previs novs indrizs d'ennaver, da runcar guaud per far pli ladas las pistas ubain novas vias d'access. Per esser pli efficient, ha la vischnanca separà quest project da la revisiun da la planisaziun locala gronda, nua che Arosa sto tranter auter redimensiunar sias zonas da bajegiar.

En ina segunda votaziun han els da Arosa ditg cleramain Gea ad il transfer da la concessiun dal dretg da las auas GKL sin «Arosa Energie». E dals auals Saoün e Fondei na vegn betg retratg aua per far electricitad. Questa schliaziun cumplessiva aveva la vischnanca preschentà suenter pliras maisas radundas.

Poschiavo

En il Puschlav po la «Centralina Idroelettrica Val Pednal Poschiavo» duvrar l'aua dal flum Val Pednal per producir forza electrica. Quest dretg d'utilisaziun è per ils proxims 60 onns.

Plinavant po quest aua era vegnir duvrada per sauar. Quai aifer il project per in sistem da sauar per l'agricultura sut il timun dal Consorzio Bonifica Fondiaria.

RTR actualitad 11:00

Artitgels legids il pli savens

Scrollar a sanestra Scrollar a dretga