A l'urna vegnan oz quatter fatschentas federalas, plinavant spetgan en il Grischun diversas votaziuns sin stgalim communal.
Decisiuns en vischnancas
Pliras vischnancas cloman il suveran a votaziuns a l'urna. Uschia decida per exempel il suveran da Cuira davart in'iniziativa che vul che la citad auza las contribuziuns annualas per la tgira d'uffants, sco er davart dus credits per occurenzas da sport. A Flem e Tusaun votescha la populaziun davart credits per engrondir il spazi da scola. Lantsch e Zezras decidan mintgamai davart in nov model da direcziun en vischnanca, perquai dovri en omaduas vischnancas ina midada parziala da la constituziun.
Quatter votaziuns federalas
- Parlament e Cussegl federal vulan sustegnair medias localas e regiunalas. In comité ha prendì il referendum cunquai ch'els èn da l'avis ch'i na dovria betg quest pachet da sustegn.
- Scumandar reclama da tubac dapertut nua che uffants e giuvenils vesan quella, quai è l'idea da l'iniziativa che vegn avant il pievel. Uschia vul il comité d'iniziativa proteger uffants e giuvenils.
- La segunda iniziativa che va en votaziun vul scumandar experiments cun animals ed umans en Svizra. Era l'import da products ch'èn vegnids sviluppads cun tals experiments duai vegnir scumandà.
- Il parlament ha decis d'abolir taxas da bul per far pli attractiva l'economia svizra. I sa tracta da taxas che interpresas ston pajar sch'ellas dovran agen chapital – dentant be per summas da passa 1 milliun francs. La Partida socialdemocratica, ils Verds ed ils sindicats han lantschà in referendum – uss decida il suveran svizzer.