Embellir la stad cun inqual occurrenza, quai è il giavisch da l'interprendider da Cuira Ivo «Fifi» Frei. Cun sia uniun khur.ch faschess el gugent ina festa da stad sco alternativa per la festa da Cuira ch'è spustada sin l'onn proxim. Rentabel e realisabel saja la festa da stad dentant be sche la regla da 1'000 persunas crodia, uschia Ivo «Fifi» Frei. Enfin lura restian els flexibel e sperian da pudair far la festa, quai p.ex. cun reparter visitadras e visitaders sin plirs plazs da la citad veglia da Cuira.
I resta difficil da planisar
Er tar la clientella da sia fatschenta da marketing saja il motto actual plitost spetgar giu quai che pertutga occurrenzas. Uschia spetgian tuts sin decisiuns da las autoritads. Ivo «Fifi» Frei spera dentant ch'inqual chaussa saja pussaivla la stad e l'atun, forsa mo en il rom pitschen, ma almain quai. Ins stoppia dentant er esser realistic ch'er occurrenzas pitschnas dovrian intgins mais preparaziun. Uschia ch'il profi da marketing na spetga betg ch'i dettia in'entira retscha festas ed occurrenzas. Quai ch'el è dentant persvadì è che la glieud spetga cun brama sin pudair giudair divertiment e cultura. Frei crai er che visitadras e visitaders sajan pronts da pajar in zic dapli per in bigliet, cunquai che organisaturs ston resguardar reglas da segirtad. La situaziun restia il mument fitg difficila.
