La PPS dal Grischun propona duas persunas a la radunanza da nominaziun per las elecziuns da la regenza da l'auter onn. Sco quai che la PPS communitgescha, pudessan ulteriurs interessents anc s'annunziar enfin la radunanza dals 4 da december. Là decida la radunanza tgi che va en la cursa per in sez en la regenza. Sco il pledader da la PPS Jann Thöny ha ditg envers RTR saja la strategia dad ir cun in ticket dad in, pia cun in candidat u ina candidata a las elecziuns 2026.
- Per l’ina stat Valérie Favre Accola (52) da Tavau a disposiziun. Ella è stataltra da Tavau e presidenta dal Cussegl Grond.
- Per l'auter sa metta a disposiziun Walter Grass (51) dad Urmein. El è pur e mainagestiun da scola da skis e presidiescha la fracziun da la PPS grischuna.
Las elecziuns da la regenza èn ils 14 da zercladur 2026. Dad occupar danov è in sez, quel dal cusseglier guvernativ Jon Domenic Parolini (AdC) che na candidescha betg pli pervi da limitaziun da l'uffizi. Dad eleger u reeleger èn cusseglieras u cussegliers guvernativs per tut ils 5 posts en la regenza grischuna.
PPS vul glistas plainas per tut ils circuits electorals
Dasper la regenza vegnan er elegids ed elegidas las 120 deputadas e deputads dal Cussegl grond. Là annunzia la PPS d'avair chattà gia 100 candidatas e candidats per las partidas regiunalas. La finamira saja però vinavant da candidar cun glistas plainas per mintga circuit electoral. Las nominaziuns per lezs sezs èn però en ils mauns da las partidas regiunalas.