Da Tschamut enfin en Val Müstair pendan els actualmain dapertut: placats da cumbat electoral. Fatschas amiaivlas, egliadas seriusas e slogans cun pleds sco «ensemen», «avegnir» u «responsabladad».
RTR ha fatg in pitschen experiment ed ha laschà analisar il material da cumbat electoral betg d’in politolog u d’ina experta da marketing, mabain d’ina intelligenza artifiziala. Gia l’emprima impressiun da l'IA è plitost calma. U era: Tenor l'IA para il cumbat electoral grischun bunamain meditativ cumpareglià cun auters pajais.
Las candidatas ed ils candidats per la regenza grischuna vulan parair simpaticas – e natiralmain vegnir elegidas.
Valerie Favre Accola: «Jau ta gid cun il formular per la decleraziun da taglia»
La candidata da la PPS Valerie Favre Accola sa mussa sin in placat classic cun fund blau e mellen. Vitiers stat: «Valerie en la regenza. Experientscha, engaschi, Grischun.»
Per l'IA para il purtret fitg accessibel:
Il purtret ha in effect simpatic ed accessibel – prest: Jau ta gid cun il formular per la decleraziun da taglia.
Nora Saratz Cazin: Podcasts davart democrazia
La candidata verdliberala Nora Saratz Cazin è da vesair suletta sin il flyer – cun in blazer oransch ed il motto: «Jau taidlel tai – perquai che ina buna politica dovra la vischinanza cun ils umans.»
L'IA vesa qua ina politica moderna ed urbana:
Ella è sco insatgi che taidla podcasts davart democrazia.
Maurizio Michael e Martin Bühler: «Buddy-Cops-Vibes»
Ils dus candidats da la PLD Maurizio Michael e Martin Bühler sa preschentan ensemen – omadus cun tschops blaus e chamischas alvas. Text n'è betg da vesair bler.
Tenor l'IA hajan els dus...
...in podcast secret davart la promoziun da l'economia.
Il Center: «In’embratschada terapeutica»
Anc pli ferm sin il tema cuminanza metta il placat dal Center cun Carmelia Maissen, Aita Zanetti e Marcus Caduff. La colur oranscha dominescha, ensemen cun pleds sco «miteinander», «ensemen» ed «insieme».
L'IA descriva quai uschia:
Quai n'è betg in placat. Quai è ina embratschada terapeutica en trais linguas naziunalas.
Peter Peyer: auter che tschels
Autramain sa preschenta il placat dal candidat da la PS Peter Peyer. Fotografias en nair ed alv, trais differentas posas ed il slogan: PETER. PUNKT. Vitiers il messadi: «Dapli tenuta, dapli Peyer» – en tut las trais linguas chantunalas.
Per l'IA è cler:
PETER. PUNKT. Tuna sco in album da jazz.
E Reto Bott?
Resta anc il candidat selvadi da l'Engiadina Reto Bott. Dad el na datti nagins flyers che pendan en il Grischun.
Betg a Tschamutt ed er betg en la Val Müstair. L'intelligenza artifiziala manegia tar quai.
Cura che jau apparesch avunda sin social media, sa smatga il flyer da sasez en memoria.
Tranter satira e realitad
Natiralmain na remplazza l’intelligenza artifiziala betg ina vaira analisa politica. Tuttina mussa l’experiment era: placats da cumbat electoral transportan bler dapli che mo slogans e colurs da partida. Ma cler è er che questas analisas da IA èn da giudair cun ina tschegnada.