La finamira da la giuventetgna da Ftan era quella d’exprimer e preschentar ils problems dal mund che regnan actualmain.
A nus era cunscient che l’acziun procura critica, nus vulevan avrir ils egls tar la populaziun e quai è reussì.
La giuventetgna è cleramain sa distanzada da vulair propagar rassissem u antisemitissem cun preschentar ina uniforma militara cun la crusch che reguarda al naziunalsocialissem. Tar lur acziun era l’idea da sensibilisar sin la situaziun geopolitica actuala.
Surpassà la lingia cotschna
Philipp Bessermann da la fundaziun cunter rassissem e antisemitissem Svizra ha plaina encletga che la giuventetgna vul s’exprimer en ina u autra maniera.
Sche la giuventetgna n'ha nagin lieu per s’exprimer, saja quai en discussiuns, en scola, a chasa u en la vischnanca in general, lura vegnan els creativs e fan acziuns che surpassan la lingia cotschna, ha ditg Bessermann.
In tal congual è problematic perquai ch'ins relativescha quella singularitad dal Holocaust.
Il Chalandamarz a Ftan dastga ins congualar cun in cortegi sumegliant al tschaiver. Mintg'onn prendan els in auter tema central. Quest onn ha la giuventetgna decis da preschentar la situaziun precara da la politica actuala sin quest mund. Mascras da persunas sco Trump e Putin, l’uniforma dad in policist d’immigraziun americana ICE, in auto construì enturn en in panzer, la bindera da l’Ucraina ed era in’unifurma militara cun la crusch che regorda al naziunalsocialissem.