Il process cunter l'anteriur selvicultur da S-chanf marscha. Dal public ennà è l'interess moderà: Radund 15 persunas èn preschentas, sco era diversas medias. Preschents èn era la persuna inculpada, l'anteriur selvicultur cun sia advocata, in affarist da l'Appenzell (sco accusader privat) ensemen cun l'advocat e per la vischnanca da S-chanf è preschent be l'advocat che represchenta la vischnanca (era accusadra privata).
Defensiun crititgescha inquisiziuns
Gia tar l’introducziun ha l'advocata da l'inculpà pretendì che las actas da l’accusaziun - vul dir il document che vegn tematisà en il process - n'accumplescha betg ils principis fundamentals d'ina simpla acta - ella acta saja memia pauc detagliada. Era è vegnì crititgà che l’inquisiziun da la Polizia chantunala na saja betg cumpletta.
Sin quai ha interrut la dretgira regiunala la sesida; è però vegnida a la conclusiun che quai na saja betg il cas, ha refusà ils puncts menziunads e cuntinuà.
Sco emprima perditga è vegnì clamà il vicepresident da S-chanf da lezzas uras, per dilucidar la collavuraziun tranter la resgia e la vischnanca. Lura è suandà l'inculpà ch'è pront da dar pled e fatg.
Inculpà sa dosta, conceda però d'avair sfalsifitgà documents
Entant ha l'inculpà era respundì las dumondas da la dretgira ed è sa dustà cunter las renfatschas d'engion, defraudaziun ed abus da l'uffizi. Tut saja capità en cunvegna cun la vischnanca e da moda transparenta - tant il pretsch dal lain sco era ils transports e las lavurs. L'um da 56 onns ha però concedì la renfatscha da sfalsificaziun da documents. El haja suttascrit ils documents, però betg savì, a tge intent che quels servian, ha ditg l'inculpà. I sa tracta da documents per il dazi, che mussavan main valita da la rauba transportada. Quai per pajar main dazi tar il transport en l'Italia.
La finala ha la Procura publica pretendì in chasti da detenziun da 2 onns cundiziunà. E per pajar custs ed indemnisaziuns duai era la chasa da l'anteriur selvicultur vegnir duvrada.
Cun ina sentenzia n'èsi betg da quintar il mardi.
Quai ch'è capità fin ussa en la causa selvicultura a S-chanf
L'october 2019 era vegnì enconuschent che l'anteriur selvicultur saja vegnì relaschà. Para ch'ins ha supponì ch’el haja malduvrà ses post sco selvicultur e mainafatschenta da la resgia forestala a S-chanf. La polizia chantunala ha sin quai fatg lavurs d’inquisiziun.
Il cas sa concentrescha sin ils onns 2014 enfin 2018 ch'ins ha constatà irregularitads. Durant quel temp haja dà manipulaziuns cun la cassa ed era mancanzas tar la facturaziun da la resgia forestala.
Rapport extern scuvra diversas irregularitads
In biro extern ha sin incumbensa da la vischnanca examinà la contabilitad avant 5 onns. Quel ha scuvert diversas irregularitads. Tranter auter irregularitads en connex cun quints da transports da laina sur il cunfin en direcziun da l'Italia. Plinavant haja la resgia vendì laina da glina «Mondholz» senza avair ina survista, quant ch’è vegnì vendì.
Plinavant vegn numnà en quel rapport in cas, nua ch'in affarist dal chantun Appenzell haja cumprà plirs onns laina da S-chanf. Enfin ch’el haja constatà irregularitads.
Chasa privata era pertutgada
Tenor quel rapport ha l'anteriur selvicultur era laschà elavurar laina per fabritgar sia chasa privata. Quantas uras ch'ils impiegads hajan duvrà, e quanta laina ch'è vegnida duvrada, n'è betg enconuschent.
La dretgira regiunala Malögia tracta quest cas ils 11 da november.