Müstair - Il stgazi emblidà da Johann Feuerstein

Suenter avair finì las lavurs enturn e per il cudesch biografic «Dinastia da fotografs Feuerstein» l’atun passa, ha Ruedi Bruderer clappa per mauns ina boxa da chartun interessanta: 50 fotografias veglias sin plattas da vaider era il cuntegn. Cun zavrar tras ils vaiders l'emprima giada, na parevan las fotografias betg d'esser insatge spezial.

Ina sensaziun per il biograf

Ma cun guardar las fotografias pli precis, ha Ruedi Bruderer realisà, che quellas eran vegnidas fatgas la fin dal 19avel tschientaner – precis da quel temp, nua che Johann Feuerstein (1871 – 1946) era activ cun sia camera en la Val Müstair.

Cun digitalisar las fotografias saja sa revelà, che quellas mussian per gronda part purtrets da la glieud en la Val Müstair.

Perditgas incumparablas dal temp

Quels purtrets da la glieud sajan da gronda valur per la regiun. Els mussian perditgas d’in temp cura ch'il fotografar era custaivel. Uschia n'eri betg normal da lez temp da fotografar la glieud normala. Per Ruedi Bruderer èsi remartgabel che las fotografias èn da fitg auta qualitad, remartgabel per la perioda d’activitad da Johann Feuerstein.

Enconuschent era, ch’el ha vivì e lavurà suenter sia giarsunadi da fotograf en la Val Müstair. Auter che ina fotografia cun in bul autentic, n’han ins betg gì ulteriuras cumprovas da sia lavur. Tenor Ruedi Bruderer èn quests 50 vaiders vegnì chattadas insacura sin il palantschin da la chasa paterna dals Feuersteins a Fuldera.

Appel a la populaziun da la Val Müstair

E uss en questas fotografias puspè turnadas en la Val Müstair. Cun agid da Ruedi Bruderer ha la Fundaziun Fotografia Feuerstein mess ensemen ina exposiziun en la Chasa Selm a Müstair. Sper fotografias our dal fundus da la fundaziun, en era las 50 fotografias chattadas, exponidas.

Questa exposiziun haja er in'ulteriura lezia: tar bleras fotografias n'existia betg ina legenda, perquai spera Ruedi Bruderer ch'ils visitaders e las visitadras portian lur albums da famiglia. Uschia saja forsa pussaivel d'identifitgar ina u l'autra persuna sin ils purtrets per cumplettar quels cun ina legenda. L'exposiziun a Müstair duai restar averta fin almain la fin da favrer.