Per purtar vinavant il project da sanaziun da la plazza aviatica a Samedan, vegnan integradas tut las gruppas d’interess. Quai ha decis la conferenza da la plazza aviatica ed ha incumbensà la cumissiun administrativa da la INFRA, la possessura da l’infrastructura, da fundar duas gruppas d’accumpagnament. Ina duai esser cumponida da gestiun ed utilisaders da la plazza aviatica, l’autra da represchentants da las partidas, purtaders da prestaziun e petiziunaris, scrivan ils responsabels en lur communicaziun. Las gruppas duain elavurar in project consolidà e surlavurar ils custs ed ils basegns dal project. Puncts che vegnan adina puspè crititgads.
Ils resultats duain vegnir preschentads a la proxima sesida da la conferenza da la plazza aviatica, l’avrigl dal 2023.
Adattaziun da la cunvegna da prestaziun
Ultra da quai ha la conferenza da la plazza aviatica incumbensà la INFRA da surlavurar la cunvegna da prestaziun cun la Engadin Airport SA. La relaziun contractuala vegnia surlavurada mintga quatter onns.
