La bilantscha definitiva da la stagiun d’enviern vegn anc fatga. L'uniun tetgala Pendicularas Grischunas spetga anc ils resultats dals dis da Pasca – lura vegn fatg bilantscha. Tge ch'è dentant gia avant cler: tranter ils differents territoris da skis datti grondas differenzas. In sguard sin tschintg territoris da skis.
Sursaissa: Ultimas stortas da la stagiun e festa
Il territori da skis Sursaissa Mundaun serra suenter la fin d'emna da Pasca. Ils ultims dis han dentant bleras persunas da tut la Svizra anc nizzegià la schanza. La cundiziun da las pistas saja uschè buna sco anc mai questa stagiun, manegian divers visitaders e visitadras. Era sche las temperaturas èn autas tegnia la naiv bain e cun il sulegl sajan quai dis da siemi.
Impressiuns da l'ultima fin d'emna da skis a Sursaissa
-
Bild 1 von 6. Bleras persunas han anc giudì ils davos dis da skis. Bildquelle: RTR.
-
Bild 2 von 6. Era per ils scolasts e scolastas da skis è la lavur prest a fin. Bildquelle: RTR.
-
Bild 3 von 6. Tenor Claudio Alig, il manader administrativ da las pendicularas Sursaissa Mundaun, saja la stagiun d'enviern stada pretensiusa, ma a la fin buna. Bildquelle: RTR.
-
Bild 4 von 6. Suenter avair giudì las pistas èn bleras persunas anc restadas per ils concerts da la «Season End Party» u per mangiar insatge. Bildquelle: RTR.
-
Bild 5 von 6. La terrassa avant il restaurant «Kartitscha» era plaina cun persunas che stan a sulegl, taidlan il concert e mangian insatge. Bildquelle: RTR.
-
Bild 6 von 6. Suenter Pasca è la stagiun da skis a Sursaissa Mundaun a fin. Bildquelle: RTR.
L'entschatta da la stagiun da skis veseva quai or auter sin las pistas. La naiv haja mancà, ed uschia saja quai la stagiun stada pretensiusa, di Claudio Alig ch'è il manader administrativ da las pendicularas.
Perquai che las cundiziuns èn uss anc uschè bunas din intgins giasts ch'i fiss bel d'anc ir pli ditg cun ils skis. Da prolungar la stagiun na saja dentant betg stada in'opziun. «Quai fiss ina gronda sfida. Perquai ch'il persunal midia bainbaud gia en lur lavur stagiunala da stad. Plinavant spetgian era revisiuns da las pendicularas.» E sch'ins guardia sin la dumonda quantas persunas che vulan anc ir sin pista, alura prendia quella giu fermamain, di Claudio Alig.
Scuol: Cuntent, malgrà sfidas
En la Engiadina Bassa èn ils responsabels cuntents cun la stagiun. Andri Poo, directur da las pendicularas Scuol-Motta Naluns, ha declerà che la stagiun da skis è stada sin in nivel sumegliant sco l’onn passà. Malgrà la mancanza da naiv al cumenzament sajan las cundiziuns sin las pistas stadas tant enavant bunas.
La stagiun da skis a Scuol cuzza anc fin in’emna suenter Pasca. Las relaziuns sajan uss bunas, di Andri Poo rient.
Igl è bunamain tipic per ils ultims pèr onns: las relaziuns èn durant la primavaira bunamain las meglras – dentant è il desideri d'ir anc cun skis lura er plaunet passà.
Ins speria perquai natiralmain anc sin intgins ferms dis finals – er sch'ins avess gì las bunas cundiziuns pli gugent gia pli baud.
Andermatt-Sedrun: Ina stagiun fantastica
En la regiun Andermatt-Sedrun è la bilantscha fitg positiva. Thomas Christen, directur da turissem da Andermatt, ha resumà la stagiun sco «fantastica». Cletg d'aura e cletg da naiv han procurà per in fitg bun sentiment tar ils turistichers en la regiun da Andermatt-Sedrun.
Mustér: ina stagiun difficila
Betg lunsch davent da la stagiun «fantastica» a Sedrun, datti in auter maletg a Mustér. La situaziun saja nuncuntentaivla. Il directur da las pendicularas, Stefan Arnold, ha confermà che la mancanza da naiv al cumenzament da la stagiun haja chaschunà sfidas considerablas. Cura che la naiv saja finalmain arrivada, hajan las cundiziuns meteorologicas betg manegià bain. Ussa, cun la tempra da primavaira, saja il giavisch dad ir sin pista pli pitschen. A Mustér spetgan ins sin buns dis da Pasca per avair almain ina buna finiziun da la stagiun.
Bivio: in maletg ambivalent
A Bivio, al pe dal Pass dal Güglia, èn las impressiuns da quest enviern ambivalentas. Gregor Vellacher, mainafatschenta da las pendicularas Bivio, ha resumà la stagiun cun impressiuns maschadadas. Bunas frequenzas durant Bumaun, pli pauc che spetgà il favrer, pauca naiv ed ina nauscha spartiziun da las vacanzas. Uschia hai dà per part pli pauca glieud sin las pistas da skis a Bivio.