Cifras exactas, quants che van propi a scarsolar na datti tenor Grischun Vacanzas betg. Però tenor ina pitschna retschertga interna, nodan la gronda part da las destinaziuns turisticas en il Grischun in cler augment da scarsoladers e scarsoladras.
Exempel Muntogna da Schons
Il «boom» da scarsolar senta er la Muntogna da Schons. Ils autos da posta che mainan ils scarsoladers sisum la Muntogna da Schons èn quest enviern bain emplenids cun persunas ch'èn en gir cun la scarsola.
Cun quai che quest enviern ha quai dà tanta naiv, datti la pussaivladad da scarsolar da sisum la Muntogna da Schons fin giu en val. Preparadas vegnan las pistas da scarsolar da l’uniun turistica Viamala. Ils davos onns ha la preparaziun da la pista custà en media radund 40’000 francs. In’investiziun che rendia tenor ils responsabels. Oravant tut quest enviern – in onn ch'er la Muntogna da Schons noda bainquant dapli scarsoladers e scarsoladras ch'ils davos onns.
