La vischnanca d'Alvra decida la gievgia saira davart in credit per la translocaziun dals abitants e da las abitantas da Brinzauls. Pervi dal privel da bovas ha la populaziun gia pliras giadas stuì bandunar per plirs mais il vitg. Tgi che vul uss bandunar il vitg duai pudair far quai senza gronds custs. 42 partidas han tschentà la dumonda da translocaziun preventiva.
La suprastanza communala dumonda per in credit da 82,56 milliuns francs. La gronda part da quels daners vegn la finala surpiglià da chantun e Confederaziun – quels surpiglian 90% dals custs totals. Ils ulteriurs 10% ston las persunas pajar che vulan far la midada. Per la vischnanca sezza duain restar custs da sin il pli 360'000 francs, sco i stat scrit en la missiva per la radunanza communala. Il parlament grischun ha gia il december concedì 50 milliuns francs per la translocaziun.
La dumonda per la midada preventiva han las partidas d'ina chasa stuì tschentar communablamain, cunquai che la chasa a Brinzauls vegn en consequenza spazzada. Il responsabel per la communicaziun da la vischnanca Alvra, Christian Gartmann, ha ditg envers l'agentura Keystone/SDA che radund 90 abitaziuns primaras e secundaras sajan pertutgadas. Quantas persunas ch'èn involvidas na sappian ins betg.
Midar entaifer da 5 onns
Sche la radunanza communala conferma il credit, tracta la regenza quel la fin da la stad – e cura ch'il project è uffizialmain approvà, han ils pertutgads alura 5 onns temp da far la midada. Els han trais pussaivladads:
- ir ad abitar en ina chasa existenta u nova insanua en il chantun
- laschar pajar ora ils daners per terren e bajetg a Brinzauls
- translocar en ina da las zonas predefinidas entaifer la vischnanca d'Alvra
Situaziun è sa stabilisada – resta dentant intscherta
Dapi radund in mez onn è il vitg da Brinzauls puspè dà liber per abitar e la populaziun è returnada. La situaziun è sa stabilisada, grazia a la gallaria da drenascha. Tuttina cuntinueschan vischnanca, chantun e Confederaziun cun il project da translocaziun. Ulteriuras evacuaziuns na sajan betg probablas, na possian dentant betg vegnir sclausas, statti scrit en la missiva da la vischnanca Alvra.