La vischnanca da Surses ha segirà cun 158 encunter 2 vuschs il provediment da basa medicinal a lunga vista, las purschidas da tgira e las abitaziuns cun service per la regiun. Cun il consentiment da la cunvegna da prestaziun cun il Center da Sanadad Savognin SA vegn prestada ina contribuziun annuala fixa d’in mez milliun francs per cuvrir ils custs da gestiun, per garantir la liquiditad e per pussibilitar investiziuns.
La cunvegna entra en vigur retroactiv a partir da l’emprim da schaner 2026, vala per almain set onns e po vegnir desditga per l’emprima giada la fin da l’onn 2032.
Approvà la planisaziun locala
Plinavant è vegnida approvada la revisiun totala da la planisaziun locala, quai cun 134 encunter 8 vuschs. Ussa vegnan las planisaziuns vertentas da las nov anteriuras vischnancas reunidas ed adattadas a las directivas actualas da la confederaziun e dal chantun.
Las zonas da construcziun vegnan reducidas, las reservas internas vegnan mobilisadas ed il svilup dals abitadis vegn concepì a moda persistenta. Las zonas da construcziun d’abitadi sa reduceschan da 23,4 hectaras sin nov mo pli 9 hectaras. Il focus da la planisaziun èn il spazi d’abitar, il mastergn, il turissem (cun indriz da far naiv a Radons en il territori da skis da Savognin) sco er la protecziun da la natira e dal maletg dal lieu. Uschia stgaffescha Surses las premissas per in svilup moderà e qualitativ ils proxims 15–20 onns.