Per il professer d'economia publica a la FHGR Andreas Nicklisch na saja quai nagina surpraisa che adina dapli firmas sa transfereschian en il Grischun. Il chantun Grischun haja in grond avantatg envers auters chantuns, grazia a l'auta qualitad da viver.
Dapi corona avain nus badà che emploiadas e las firmas sezzas mettan bler pais sin la qualitad da viver.
Er il Grischun cumbatta cun la mancanza da persunal dal fatg. Quai saja dapertut uschia.
L'auta qualitad da viver gidia al chantun en quest connex. «Betg mo ils collavuraturs e las collavuraturas, mabain era ils possessurs da firmas vivan là nua ch'els lessan viver», uschia l'expert da la FHGR vinavant.
Betg l'autezza da la taglia è decisiva mabain la stabilitad
Sper quai è era la tariffa da taglia in argument per il Grischun. Betg perquai che quella è bassa, mabain perquai ch'ella na sa mida betg adina puspè. Cumpareglià cun auters lieus adatteschia il Grischun la taglia be a moda fitg moderada e sche lura be en discurs cun las grondas associaziuns d'interpresas. Quai stimian las grondas interpresas lura er.
Andreas Nicklisch quinta sut quellas circumstanzas ch'il Grischun attiria er en l'avegnir dapli firmas che quai ch'el perda. Sche quai saja in trend propi a lunga vista, vegnia a sa mussar. Ma almain a media vista possian ins dir che la situaziun actuala saja en favur dal Grischun. E l'expert na vesa nagina raschun che quai pudess sa midar il proxim temp.