Mintg’auter automobilist en il Grischun posseda il 2035 in vehichel electric, uschia las prognosas. Quai è bun per il clima perquai ch'in e-auto n’emetta nagin CO2. Per la cassa statala èsi però mender. Per e-autos datti actualmain generus rabats da taglia da traffic. Be autos da benzin e diesel pajan la taglia cumplaina, ma da lezs datti adina damain.
Quest sistem duai sa midar. La regenza propona da sbassar, resp. stritgar, ils rabats per ils e-autos. Ella suttametta al Cussegl grond la revisiun totala da la lescha che regla questas taglias. Qua las respostas a las dumondas principalas che pertutgan questa midada.
La prestaziun ed il pais d’in vehichel – saja quai in auto, in camiun u in töf – èn decisivs per la nova taglia da traffic. Pervi da la battaria è in e-auto per il solit pli grev ch’in auto che marscha cun benzin. Perquai vegnan quintads be 80 % dal pais da vehichels electrics.
Cun il rabat da taglia han ins fin ussa vulì intimar automobilists ed automobilistas da cumprar vehichels electrics. Quest stimul n‘è tenor la regenza betg pli necessari a partir dal 2035.
Fin il 2030 vegn dentant anc concedì in bonus da taglia per vehichels electrics. Quest bonus n’è dentant betg uschè generus sco il rabat d’enfin qua. Dal 2031 fin il 2034 vala in bonus reducì. Suenter èsi da pajar per e-autos tanta taglia sco per autos che van cun benzin u diesel.
Il messadi da la regenza enumerescha per passa 30 models d’autos – ils models pli frequents en il Grischun – quanta taglia ch’igl è da pajar.
Tge mida per il Tesla ed il Fiat 500e?
Tgi che posseda in e-auto sto pajar en l’avegnir bler dapli taglia. Per il Fiat 500e vala il suandant:
- 90 francs taglia actuala
- 169 francs nova taglia cun bonus
- 339 francs taglia a partir dal 2035
Per il Tesla Model 3 vala:
- 99 francs taglia actuala
- 387 francs nova taglia cun bonus
- 774 francs taglia a partir dal 2035
Tgi paja damain e tgi dapli?
Per 40 % dals proprietaris d’autos sa reducescha la taglia da traffic in zichel. In exempel è il Skoda Ocatvia che marscha cun diesel:
- 570 francs taglia actuala
- 558 francs taglia nova
Per la gronda part dals autos da benzin e diesel s’augmenta la taglia dentant levet. Cun in augment pli grond ston quintar ils automobilists cun vehichels da sport, per exempel il Ferrari F8:
- 1047 francs taglia actuala
- 1408 francs taglia nova
Accepta il Cussegl grond questa proposta?
Avant che la nova taglia da traffic possia ir en vigur, sto il Cussegl grond anc sa fatschentar cun tut. El tracta la fatschenta ils 21 d’avrigl.
En la cumissiun predeliberanta n’hai dà naginas propostas da refusar la fatschenta. Ma singulas recumandaziuns da midar il sboz da la Regenza fa la cumissiun tuttina.
Tge recumonda la cumissiun?
Il bonus per e-autos importa 50 % fin il 2030 e suenter 25 % fin il 2034. Gliez è la proposta da la Regenza.
Ina maioritad da la cumissiun recumonda ina regla pli simpla ed in zichel pli generusa, numnadamain in bonus da maximalmain 60% che vala fin il 2034. Per questa varianta èn s’exprimids ils commembers da cumissiun dal Center, da la PLD e da la PPS. Questas fracziuns han la maioritad en il Cussegl grond.
Cura va la nova lescha en vigur?
Tenor messadi aveva la Regenza planisà da metter en vigur la lescha revedida a l’entschatta dal 2027 – sut la cundiziun ch’i na dettia nagin referendum. Ma era senza referendum daventa quai sportiv. I dura numnadamain otg mais per adattar il sistem dad EDV en l’uffizi per il traffic sin via a las novas taglias.
Per tge dovra il Chantun las entradas?
Cun la taglia da traffic vegnan finanziads l’emprim tut ils custs da l’uffizi per il traffic sin via. Il rest dals daners vegn duvrà per construir e mantegnair vias. La Regenza crai che las expensas per vias restian en l’avegnir almain tuttina autas sco fin qua, perquai na duain era las entradas betg sa reducir.
Betg mo il Grischun, era auters chantuns scursaneschan u stritgan ils rabats da taglia per vehichels electrics. Uschiglio sa svidassan, cun l’augment da la e-mobilitad, las cassas per finanziar las vias – ch’era ils vehichels electrics dovran di per di.