Il Cussegl grond vul auzar las impostas da traffic per autos electrics. Il parlament grischun ha deliberà la revisiun da la lescha introductiva tar la lescha federala davart il traffic sin via – quai suenter ina debatta intensiva.
La midada duai numnadamain garantir ch'i vegnia en avunda daners cun l'imposta da traffic per pudair mantegnair las vias - equai era, cura ch'i dat dapli autos electrics.
Tenor paisa e prestaziun enstagl da cilindrada
Concret munta quai che l'imposta da traffic vegn definida tenor paisa e prestaziun da l'auto, e betg pli tenor volumen dals cilinders sco fin qua. Uschia pajan autos electrics en l'avegnir dapli impostas da traffic, ed ils rabats vegnan pli pitschens – maximalmain 60% e betg sco oz 80%.
Quests rabats vegnan però evaluads mintg'onn da nov e dependan da la quantitad d'autos electrics ch'èn registrads. Sche nagin na piglia il referendum facultativ, lura vegn quest sistem flexibel introducì a partir da l'onn proxim e vala en ina emprima etappa per ils proxims 8 onns. Cun referendum vegn la fatschenta a l'urna.
Dumber d'autos electrics crescha era en il Grischun
Mintg’auter automobilist en il Grischun posseda il 2035 in vehichel electric, pretendan las prognosas. Quai è bun per il clima, perquai ch'in e-auto n’emetta nagin CO₂. Per la cassa statala èsi però mender, perquai che las entradas da la taglia da traffic sereduceschan cun ils generus rabats per autos electrics. Be autos da benzin e diesel pajan la taglia cumplaina, ma da lezs datti adina damain.
La prestaziun ed il pais d’in vehichel – saja quai in auto, in camiun u in töf – èn decisivs per la nova taglia da traffic. Pervi da la battaria è in e-auto per il solit pli grev ch’in auto che marscha cun benzin. Perquai vegnan quintads be 80 % dal pais da vehichels electrics.
Cun il rabat da taglia han ins fin ussa vulì intimar automobilists ed automobilistas da cumprar vehichels electrics. Quest stimul n‘è tenor la regenza betg pli necessari a partir dal 2035.
Fin il 2030 vegn dentant anc concedì in bonus da taglia per vehichels electrics. Quest bonus n’è dentant betg uschè generus sco il rabat d’enfin qua. Dal 2031 fin il 2034 vala in bonus reducì. Suenter èsi da pajar per e-autos tanta taglia sco per autos che van cun benzin u diesel.
Betg mo il Grischun, era auters chantuns reduceschan u stritgan ils rabats da taglia per vehichels electrics. Uschiglio sa svidassan cun l’augment da la e-mobilitad las cassas per finanziar las vias – ch’era ils vehichels electrics dovran di per di.