Il program da regenza 2021-2024 sa focussescha sin quests puncts centrals:
- digitalisaziun ed innovaziun,
- Green Deal,
- chantun da muntogna multifar.
En il program da l'onn vegnan ils puncts concretisads sco finamiras e mesiras. Per il 2023 èn formuladas 94 finamiras che duain vegnir cuntanschidas en il decurs da l'onn. Quellas ha il Cussegl grond discutà en la sesida dal december. Ils focus per ils mais proxims èn:
- Meglierar l’attractivitad da l’administraziun chantunala sco patruna. Cun la lescha da persunal revedida vegn promovì la lavur parziala e la cumpatibilitad da famiglia e lavur vegn meglierada. Sco proxim pass duain la paja, purschida sociala e purschida accessorica a la paja vegnir refurmadas.
- Digitalisaziun: Reelavurar la strategia da l'E-Government chantunal. Per quai vegn elavurà ina nova lescha e leschas actualas ston vegnir revedidas.
- Realisar la lescha per la tgira d’uffants cumplementara. Quai per rinforzar la cumpatibilitad da famiglia e lavur sco era il svilup dals uffants. Qua vegnan anc elavurads ils detagls.
- Instradar la planisaziun e realisaziun dal nov center per la scola auta spezialisada.
- Meglierar la situaziun en il sectur da sanadad cun realisar l'iniziativa da tgira. Per quai intent pretenda la Confederaziun ch'ils custs da la scolaziun pratica vegnia finanziada almain parzialmain dal chantun. Plinavant duai il chantun sustegnair persunal da tgira tar scolaziuns. Ed il chantun duai auzar il dumber da diploms da scolas spezialisadas cun contribuziuns pli autas.
- La planisaziun prospectiva en il sectur d'energia ha la finamira da preparar il Grischun sin ina pussaivla mancanza d'energia.
- Engrondir l'attractivitad dal traffic public cun il project «Vision GR 2025». Quel structurescha da nov la structura da tariffas per far ellas pli simplas e transparentas. Vinavant vegn introducì il sistem «Vendita 21» per levgiar la cumpra da bigliets.
Emprim inscunter per Maissen e Bühler
Tar lur emprim inscunter cun las medias e la preschentaziun dal program da la regenza cun ils puncts centrals per l'onn 2023 èn Carmelia Maissen e Martin Bühler pir ina giada 10 dis en uffizi. Per Martin Bühler ha la partenza da ses uffizi en il Departament da finanzas cumenzà cun ina novitad pauc cuntantaivla. La Banca Naziunala Svizra na po pajar nagut als chantuns, uschia ch'ils 60 milliuns ch'il Grischun aveva quintà da retschaiver vegnan a mancar. Quai na vegnia dentant tenor Martin Bühler betg a metter sin chau il preventiv dal chantun. Far il proxim budget daventia dentant ina sfida, Martin Bühler na po anc betg giuditgar tge influenza che la guerra en l'Ukraina ubain la situaziun d'energia vegnan ad avair sin il proxim budget.
Carmelia Maissen ha cun ses Departament per infrastructura, energia e mobilitad era surpiglià in dals temas ils pli emoziunals en il chantun: il dossier luf. Avant da curt è vegnì enconuschent che pliras organisaziuns pitschnas d'ambient prendan il referendum encunter la revisiun da la lescha da chatscha. Carmelia Maissen è da buna speranza da pudair far frunt a la sfida luf. Ella vegnia a sa leger en ed a tadlar tiers a las persunas responsablas. Tge accents ch'ella vegn concret a metter puncto politica da lufs saja anc memia baud da dir. Ils dus novs cussegliers en uffizi dovran anc emprim in zic temps da sa lavurar en.
