Midaments tar leschas che pertutgan stalking, vaccinaziuns e la geografia svizra
- Tge che pertutga las cassas da malsauns datti era il 2026 intginas midadas. Per exempel vegnan ils custs d’intginas vaccinaziuns surpiglià da las cassas da malsauns – era sche la franschisa è anc betg duvrada si. Per exempel tar la vaccinaziun da difteria e tetanus. La finamira è che la rata da vaccinaziuns en Svizra s’augmenta.
- E sco gia ils onns passads vegnan a s'augmentar las premias da las cassas da malsauns – quai per 4,4%. Motiv saja che l'aspectativa da vita crescha ed era pervi da novs medicaments.
- In midament en il cudesch penal pussibilitescha a partir dal 2026 da chastiar persunas che fan stalking. Tar quai tutga persequitar, mulestar ed smanatschar ad insatgi. Sche la victima fa implant alura po stalking tenor la lescha dar in chasti da praschun enfin trais onns u ina multa.
- E dus midaments datti il 2026 pervi da duas votaziuns: Per l’ina duess a partir dal december 2026 vegnir pajada ora la 13avla AVS. Sco che questa duess vegnir finanziada è anc adina avert ed era dispitaivel. Sco segunda chaussa vegn introducida la E-ID il mez u a la fin dal 2026. Davart l’identitad electronica ha la populaziun svizra vuschà il settember 2025 e ditg Gea. Il diever da questa è facultativ e gratuit.
- E lura sa mida anc insatge vi da la geografia svizra. A partir dals emprim da schaner 2026 tutga la citad Moutier betg pli tar Berna mabain tar il Giura. Quai pertutga radund 7’000 persunas che fan en quest senn midada da chantun a chantun. Quai ha sco consequenza che la citad Moutier è in district dal Giura e survegn 7 da 60 sez en il parlament chantunal.
Ils eveniments sportivs
- Laax Open (14-18 da schaner 2026)
L'eveniment transfurma Laax en in mecca da freestyle. Il schaner sa scuntran atletas ed atlets internaziunals da snowboard e da freeski per cumbatter per slopestyle e halfpipe en l'atmosfera da la cuppa mundiala. Acts live, rail ed in festival cumpletteschan quest eveniment.
- White Turf a San Murezzan (ils 8, 15 e 22 da favrer 2026)
Sin il Lai da San Murezzan schelà han lieu durant trais dumengias cursas da chavals spectacularas: galop, trottar ed il skijöring unic nua che skiunzas e skiunzs vegnan tratgs da chavals. Per quest intent datti in program accumpagnant glamurus cun musica, culinarica ed in'ambianza da VIP.
- Olimpia – gieus d'enviern Milaun Cortina (06–22 da favrer 2026)
Ils 25avels gieus olimpics d'enviern han lieu en nossa vischinanza da l'Italia – in grond dumber da concurrenzas a Milaun, Cortina e co. Las cursas cumenzan uffizialmain ils 6 da favrer (ceremonia d'avertura), las concurrenzas duran fin ils 22 da favrer.
- Maraton da skis engiadinais (8 da mars 2026)
Il segund grond maraton dal mund maina ils 8 da mars da Malögia a S‐chanf (42 km) tras la cuntrada da naiv da l'Engiadin'Ota. Part da l'emna da maraton: Mezmaraton, cursa da dunnas e cursa da notg – in festival da cursa permanenta en il cor dal Grischun. - Festa federala da tir (5 da zercladur – 5 da fanadur 2026)
Cuira ed il chantun Grischun sa transfurman dal zercladur fin il fanadur en la scena dal sport da tir en Svizra. Var 36'000 tiraduras e tiradurs e 100'000 visitadras e visitaders festiveschan en in mix da tradiziun, da precisiun e da flair alpin.
- Race Across Switzerland (22–26 da fanadur 2026)
In'aventura dad ultra-cicling tras il parc grischun (partenza e finamira: Claustra‐Serneus). Las distanzas da 200 kilometers (partenzas da notg), 300 km, 500 km ed il traject roial da 1'000 km) mainan sur ils pass alpins e tras las vals alpinas – ina sfida pura per atlets da perseveranza. - Campiunadi mundial da ballape (11 da zercladur – 19 da fanadur)
Il campiunadi en l'America dal Nord vegn ad esser il pli grond turnier dal campiunadi mundial d'enfin ussa – cun 48 naziuns participantas e cun 104 gieus.
Tge gira en il kino?
- Die Odyssee: Il film da Chrisopher Nolan raquinta l'istorgia dal retg Odisseus suenter la guerra da Troja nua ch'el fa in viadi privlus da 10 onns a chasa. Il film è ina producziun monumentala cun stars sco Tom Holland e Zendaya che vegn a metter sin la taila l'istorgia renumada cun il stil tipic da Nolan.
- Dune 3: En la terza part da la seria da Dune sa basa il reschissur Denis Villeneuves sin il segund cudesch da Frank Herbert. L'istorgia cumenza 12 onns suenter l'istorgia da Dune 2. Paul Atreides mussa sco imperatur sia pussanza e vegn smanatschà d'in cumplot. In attentat al fa vegnir tschorv e Chani mora tar la naschientscha da ses schumellins. Il film duai sa concentrar pli fitg sin intrigas e filosofia, il start dal kino vegn spetgà per il december 2026, cun acturs enconuschents sco Timothée Chalamet e Zendaya.
- Der Teufel trägt Prada 2: En la nova part sesa Miranda Priestly anc adina sin la sutga da schef dal magazin. Ils temps èn dentant daventads pli pretensius. I dovra – sper l'inschign – adina meglras relaziuns per vegnir economicamain sur las rundas. Igl è perquai interessant che l'anteriura assistenta da Miranda è entant en l'etascha da schefs d'in concern da luxus che po pumpar daners da reclama en il mund da las chasas edituras. Nua che Andy sa chatta puspè en il cumbel da pussanza ed intrigas n'è anc betg dal tut cler. La basa dal film è danovamain in roman da Lauren Weisberger, cumparì il 2013. En las rollas principalas èn era questa giada Anne Hathaway e Meryl Streep.
- Michael: Il nov biopic da Michael Jackson cun il titel Michael cumpara ils 24 d'avrigl 2026 en ils kinos sin tut il mund. Cun Jaafar Jackson (ses nev) en la rolla principala, sut la reschia dad Antoine Fuqua e cun musica da John Logan, empermetta il film ina invista profunda da la carriera da Michael Jackson. Davent dals Jackson Five fin tar ses status da «King of Pop». Il film mussa performances iconicas ed illuminescha sia vita da l'autra vart da la musica.